ەلىمىزدە 700 مىڭنان استام ادام كۇيزەلىستە ءجۇر

депрессия
فوتو: freepik

استانا. قازاقپارات - Countrycassette حالىقارالىق تاۋەلسىز ينتەرنەت جۋرنالىنىڭ مالىمەتىنشە، كۇيزەلىسكە شالدىققان قازاقستاندىقتاردىڭ ۇلەسى - 4,4 پايىز. بۇل كورسەتكىش بويىنشا قازاقستان 180 ەلدىڭ اراسىندا 93-ورىنعا تۇراقتادى.

Ranking.kz تاراتقان مالىمەتكە سۇيەنسەك، جاھاندىق كورسەتكىش ايتارلىقتاي تومەن (3,9 پايىز). بەلگىلى بولعانداي، ەلىمىزدە كۇيزەلىسكە بەيىم ازاماتتاردىڭ سانى 732,7 مىڭعا جەتىپ وتىر. ءبىراق، بۇل - بولجامدى كورسەتكىش.

ق ر دەنساۋلىق ساقتاۋ مينيسترلىگى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ (ر پ د ع پ و) دەرەگىنشە، 2023 -جىلى ديناميكالىق باقىلاۋداعى پسيحيكالىق جانە مىنەز- قۇلىق بۇزىلىستارى بار ناۋقاستاردىڭ جالپى سانى 198,4 مىڭ ادامنان اسىپ وتىر.

سوڭعى ءبىر جىلدا ەلدەگى پسيحياتريالىق ستاتسيونارلار كورسەتكەن قىزمەت كولەمى %29,7 ءوستى. ەگەر 2022 -جىلى مۇنداي مامانداندىرىلعان مەديتسينالىق مەكەمەلەر 42,4 ميلليارد تەڭگەنىڭ (ءتورت توقسانداعى جالپى مالىمەتتەر) قىزمەت كورسەتكەن بولسا، 2023 -جىلى بۇل سوما 54,9 ميلليارد تەڭگەدەن استى.

قازاقستاندا سوڭعى جىلدارى ءوز-وزىنە قول جۇمساۋ جاعدايى ءىس جۇزىندە وزگەرگەن جوق. ءبىر جىلدا 3,5 مىڭنان 4 مىڭعا دەيىن ادام ءوز ەركىمەن ءوز ءومىرىن قيدى. بىلتىر 12 ايدا ەلىمىزدە 3,7 مىڭعا جۋىق ادام ءوز-وزىنە قول جۇمساعان. ونىڭ 234 ى - كامەلەتكە تولماعاندار.

ايتا كەتەيىك، كۇيزەلىس ەڭ كوپ تاراعان ەلدەردىڭ بەستىگىندە پسيحيكالىق بۇزىلىستىڭ بەلگىلەرى بار حالىقتىڭ ۇلەسى %6,3 دى قۇرايتىن ۋكراينا الدا تۇر. ودان كەيىن ا ق ش، اۋستراليا جانە ەستونيا جايعاسقان. اتالعان ەلدەردە كورسەتكىش 5,9 پايىزعا تەڭ.

اۆتور

ورالحان قوجانوۆ

سوڭعى جاڭالىقتار