ەلىمىزدە 104 مىڭ شارشى شاقىرىم اۋماقتا بارلاۋ جۇمىستارى جۇرگىزىلدى

استانا. قازاقپارات - 11 اي ىشىندە جەر قويناۋىن گەولوگيالىق بارلاۋعا 55 ليتسەنزيا بەرىلدى، دەپ حابارلايدى گەولوگيا كوميتەتى.

ونىڭ 16 سى گەولوگيالىق ءتۇسىرۋ، 5 ءى گەوفيزيكالىق جۇمىستار، 34 ءى جەر استى سۋلارى بويىنشا.

ايماقتىق گەولوگيالىق بارلاۋ جۇرگىزۋ زەرتتەلەتىن اۋماقتى 2026-جىلعا قاراي 2,2 ميلليون شارشى كيلومەترگە دەيىن ۇلعايتادى. 2024-جىلى جالپى بارلانعان اۋماق 104 مىڭ شارشى كيلومەتردى قۇرادى.

بۇل رەتتە 11 ۋچاسكەدە سيرەك جەر مەتالدارىن انىقتاۋ بويىنشا ىزدەستىرۋ جۇمىستارى اياقتالدى.

وسى جۇمىستاردىڭ قورىتىندىسى بويىنشا قاراعاندى وبلىسىنداعى كۇيرەكتىكول ۋچاسكەسىنىڭ پەرسپەكتيۆالارى اتاپ ءوتىلدى. ۋچاسكەنىڭ الدىن الا قورى ونەركاسىپتى يگەرۋگە قاجەتتى شامامەن 800 مىڭ توننا شيكىزاتتى قۇرايدى. ال بولجامدى رەسۋرستارى - 935 مىڭ توننا سيرەك جەر مەتالدارى، ونىڭ ىشىندە سەري مەن لانتانيدتەر.

قوستاناي وبلىسىندا «اقبۇلاق» ۋچاسكەسىندە جۇمىس جۇرگىزىلىپ، 2 التىن، 1 التىن جانە مىس ۋچاسكەسى انىقتالدى.

الەۋەتتى جەر قويناۋىن پايدالانۋشىلاردىڭ جەر قويناۋىن مەملەكەتتىك گەولوگيالىق زەرتتەۋ جۇمىستارى ناتيجەلەرىنە قولجەتىمدىلىگىن قامتاماسىز ەتۋ ماقساتىندا ناتيجەلەر e.geology.kz ەلەكتروندى ۆەب-سايتىندا جاريالانادى.

جەر استى سۋلارىنىڭ مونيتورينگىن بولەك اتاپ ءوتۋ قاجەت. 2024-جىلى مونيتورينگكە 765 ميلليون تەڭگە ءبولىندى. ماقسات - 4004 مونيتورينگت پۋنكتتەرىندەگى جەر استى سۋلارىنىڭ جانە قاۋىپتى گەولوگيالىق پروتسەستەردىڭ جاي-كۇيىنىڭ ساندىق جانە ساپالىق كورسەتكىشتەرىن الۋ.

ەسكە سالساق، بۇدان بۇرىن ەلىمىزدە 250,6 مىڭ گەكتار جەر ونەركاسىپ سالدارىنان بۇلىنگەنىن جازدىق.