ەلىمىزدە 1 شاقىرىم اۆتوجول سالۋعا قانشا قاراجات كەتەدى

استانا. KAZINFORM - «قازاۆتوجول» ۇ ك» ا ق ەلىمىزدە 1 شاقىرىم جول سالۋ ءۇشىن قانشا قاراجات جۇمسالاتىنىن مالىمدەدى.

«قازىرگى سمەتالىق-نورماتيۆتىك بازاعا سايكەس، حالىقارالىق جانە رەسپۋبليكالىق ماڭىزى بار ءى-ب تەحنيكالىق ساناتتاعى (قوزعالىسقا ارنالعان 4 جولاعى بار) 1 شاقىرىم جولدى سالۋ جانە جاڭعىرتۋ قۇنى ورتاشا ەسەپپەن 1,5-2 ميلليارد تەڭگەنى، Ⅱ تەحنيكالىق ساناتتاعى (قوزعالىسقا ارنالعان 2 جولاعى بار) 1 شاقىرىم جولدى سالۋ جانە جاڭعىرتۋ قۇنى - ورتا ەسەپپەن 1-1,2 ميلليارد تەڭگە» دەلىنگەن اتالعان كومپانيانىڭ اگەنتتىك ساۋالىنا بەرگەن جاۋابىندا.

«قازاۆتوجول» ۇسىنعان دەرەككە قاراعاندا، ەۋروپا ەلدەرىندە 1- تەحنيكالىق ساناتتاعى اۆتوجولدىڭ 1 شاقىرىمىنىڭ قۇنى 3,5 ميلليارد تەڭگەدەن (پولشادا - 3,5 ميلليارد تەڭگە، گەرمانيادا - 3,8 ميلليارد تەڭگە، اۆستريادا - 5,5 ميلليارد تەڭگە) باستالادى.

بۇل قازاقستاندا جۇمسالاتىن قارجىدان 2 ەسە كوپ.

تاياۋ شەتەلدەردە 1 شاقىرىم جولدىڭ قۇنى 3 ميلليارد تەڭگەدەن (قىتايدا - 12 ميلليارد تەڭگە، رەسەيدە - 3 ميلليارد تەڭگە) باستالىپ، قىمباتتاي بەرەدى.

«سونىمەن قاتار 1 شاقىرىم جولدىڭ قۇنى جوبا جۇزەگە اسىرىلاتىن اۋماقتىق جەرگە (ماسەلەن، رەسپۋبليكانىڭ باتىس وڭىرلەرىندە ينەرتتى ماتەريال جوق بولعاندىقتان ونى تاسىمالداۋعا تۋرا كەلەدى. سوندىقتان جول قۇنى دا كوتەرىلەدى) ، جاساندى قۇرىلىستار سانىنا، دەمالىس الاڭدارىنا جانە باسقالارىنا بايلانىستى. بۇعان قوسا، اۆتوجولدىڭ قۇن كورسەتكىشتەرى الەمدىك ەكونوميكالىق كورسەتكىشتەرگە وراي ماتەريالدىق رەسۋرستاردىڭ قىمباتتاۋى مەن ەڭبەك شىعىستارىنا بايلانىستى ەكەندىگىن اتاپ وتكىمىز كەلەدى. ماسەلەن، ينفلياتسيا جىلدىڭ ءار جاڭا توقسانىندا ءوسىپ وتىرادى» دەپ تۇسىندىرەدى كومپانيادان.