ەلىمىزگە ماسكا رەجيمى قايتا ەنگىزىلۋى مۇمكىن بە

قازاقستاندىقتار قايتا ماسكا تاعۋى مۇمكىن بە؟ بۇل ساۋالعا ق ر دەنساۋلىق ساقتاۋ ءمينيسترى اجار عينيات جاۋاپ بەردى، دەپ حابارلايدى Kazinform.

«كوروناۆيرۋس ينفەكسياسىنىڭ تارالۋى جىل بويى جۇرەدى. ءبىز ونى اي سايىن تىركەپ، باقىلاپ وتىرمىز. كوروناۆيرۋس جۇقتىرۋ فوندىق (فونوۆىە) اۋرۋلارى بار ادامدارعا قيىنعا تۇسەدى. بۇل - نەگىزىنەن قارتتار. ودان بولەك سوزىلمالى اۋرۋى بار ناۋقاستار، اسىرەسە تىنىس الۋ جانە جۇرەك- قان تامىرلارى دەرتىنە شالدىققاندارعا دا وڭايعا سوقپايدى. وسى ورايدا ءبىز جوعارىدا اتالعان قاتارداعى ازاماتتاردى ريەۆاكتسيناتسيادان ءوتۋدى ۇسىنامىز»، - دەدى اجار عينيات ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ونىڭ ايتۋىنشا، وتكەن جىلى 350 مىڭ ازامات COVID-19 ينفەكسياسىنا قارسى ەكپە العان. سونداي-اق مينيستر «قازاقستاندىقتار قايتا ماسكا تاعا ما؟» دەگەن ساۋالعا جاۋاپ بەردى.

«ءبىز ماسكا تاعۋدى ۇسىنامىز. جرۆي ماۋسىمى قالاي باستالادى، ياعني قازان-مامىر ايلارى ارالىعىندا باس سانيتارلىق دارىگەردىڭ قاۋلىسىمەن ماسكا كيۋ ۇسىنىلادى. سونىمەن قاتار مەديتسينالىق ۇيىمداردا دا ماسكا رەجيمى ەنگىزىلەدى. ماسكاعا قاتىستى تاعى ءبىر ناقتىلاعىم كەلەدى، ءبىز تەك ۇسىنامىز»، - دەپ تولىقتىردى ۆەدومستۆو باسشىسى.