ەلىمىز ەكسپورتتىق ساياساتىن كۇشەيتەدى
استانا. KAZINFORM - قازاقستان بىرىككەن اراب امىرلىكتەرىمەن كورسەتىلەتىن قىزمەتتەر مەن ينۆەستيتسيالاردىڭ ەركىن ساۋداسى تۋرالى كەلىسىم جاساسپاق.
بۇل تۋرالى ساۋدا جانە ينتەگراتسيا مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى ارمان شاققاليەۆ ايتتى.
ونىڭ اتاپ وتۋىنشە، مينيسترلىكتىڭ الدىنا ەكسپورتتى ىلگەرىلەتۋ ءۇشىن قاجەتتى قۇرالداردى شوعىرلاندىرا وتىرا، ەكسپورتتى قولداۋدىڭ ءبىرىڭعاي تەرەزەسىن قۇرۋ مىندەتى جۇكتەلگەن.
- وتكەن جىلدىڭ قاڭتار ايىندا ساقتاندىرۋ جانە قارجىلىق قولداۋ شارالارىنىڭ كەڭ سپەكترىن جۇزەگە اسىرۋعا باعىتتالعان «ەكسپورتتىق نەسيە اگەنتتىگى تۋرالى» زاڭ قابىلداندى. وسى باعىتتا قازاقستاننىڭ ەكسپورتتىق نەسيە اگەنتتىگى قولداۋ قۇرالدارىنىڭ قاتارىن كەڭەيتتى. سۋبسيديالاۋعا بالاما رەتىندە كەپىلدىك بەرۋ، ەكسپورت الدىنداعى جانە ساۋدا قارجىلاندىرۋ قۇرالدارى ەنگىزىلدى. كولىك دالىزدەرىنىڭ دامۋىن ەسكەرە وتىرىپ، قىتاي، ەۋرازيالىق ەكونوميكالىق وداق، ورتالىق ازيا، ەۋروپالىق وداق جانە تاياۋ شىعىس ەلدەرى سياقتى نارىقتارى انىقتالدى، - دەدى ارمان شاققاليەۆ.
سونداي-اق، ول سىرتقى ساۋدا بايلانىستارىن كەڭەيتۋ ماقساتىندا قازاقستان مەن سينگاپۋر اراسىنداعى كورسەتىلەتىن قىزمەتتەر مەن ينۆەستيتسيالاردىڭ ەركىن ساۋداسى تۋرالى كەلىسىم راتيفيكاتسيالانعانىن ايتتى.
- بۇعان قوسا تولىق فورماتتى كەلىسىم بىرىككەن اراب امىرلىكتەرىمەن جۇرگىزىلىپ جاتىر. يران جانە ەۋرازيالىق ەكونوميكالىق وداق اياسىندا تاۋارلاردىڭ ەركىن ساۋداسى تۋرالى تولىق فورماتتى كەلىسىمدى راتيفيكاتسيالاۋ اياقتالدى، - دەدى مينيستر.
وسىعان دەيىن ارمان شاققاليەۆ ساۋدا مينيسترلىگىنىڭ باسىم مىندەتتەرىن اتاعانى تۋرالى جازدىق.
