ەلىمىزگە كەلەتىن شەتەلدىك تۋريستەر سانى ەكى ەسە كوبەيگەن
استانا. KAZINFORM – ق ر تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن مينيسترلىكتىڭ كەڭەيتىلگەن اپپاراتتىق كەڭەسى ءوتتى.

جيىنعا مينيسترلىك وكىلدەرى، وڭىرلىك تۋريزم سالاسىنا جاۋاپتى باسقارما باسشىلارى جانە ۆەدومستۆوعا باعىنىستى ۇيىمداردىڭ جەتەكشىلەرى قاتىستى. كەڭەستە تۋريزم سالاسىنىڭ نەگىزگى كورسەتكىشتەر تىڭدالىپ، وتاندىق تۋريزم سالاسىنىڭ دامۋ باعىتتارى مەن وزەكتى ماسەلەلەرى جان-جاقتى تالقىلاندى.
مينيسترلىكتىڭ باسپا ءسوز قىزمەتى ءمالىم ەتكەندەي، ەربول مىرزابوسىنوۆ تۋريزم يندۋسترياسىنداعى وڭ وزگەرىستەردى اتاپ ءوتىپ، ىشكى جانە سىرتقى تۋريستىك اعىننىڭ تۇراقتى ءوسىپ كەلە جاتقانىن جەتكىزدى. ماسەلەن، بىلتىرعى 9 ايدىڭ كورسەتكىشى بويىنشا ىشكى تۋريستەر سانى 562 مىڭعا كوبەيىپ، 6 ميلليون ادامعا جەتتى.
شەتەلدىك تۋريستەر لەگى 11,5 ميلليون ادام بولدى. بۇل 2023-جىلدىڭ سايكەس كەزەڭىندەگى كورسەتكىشپەن سالىستىرعاندا ەكى ەسە كوپ. ونىڭ ىشىندە 969 مىڭ شەتەلدىك ورنالاستىرۋ ورىندارىنا توقتاعان.
- بىلتىر مەملەكەت باسشىسى وتاندىق تۋريزمدى دامىتۋ ماسەلەسىنە ارنالعان ارنايى كەڭەس وتكىزگەن بولاتىن. سول جيىندا پرەزيدەنت تۋريزمدى دامىتۋ جونىندە ءبىرقاتار تاپسىرما بەرگەن ەدى. بۇگىنگى كەزدەسۋدىڭ نەگىزگى ماقساتى - پرەزيدەنت تاپسىرمالارىنىڭ ورىندالۋ بارىسىن جانە وڭىرلىك تۋريزمنىڭ ماسەلەسىن تالقىلاۋ، - دەدى مينيستر.
كەڭەستە وڭىرلەردە كەزدەسەتىن وزەكتى ماسەلەلەر كوتەرىلىپ، ولاردى شەشۋ جولدارى قاراستىرىلدى. اسىرەسە، تۋريستىك ينفراقۇرىلىمدى دامىتۋ، جاڭا باعىتتاردى اشۋ، مەملەكەتتىك قولداۋ شارالارى ارقىلى كاسىپكەرلىكتى ىنتالاندىرۋ سياقتى ماسەلەلەرگە ەرەكشە نازار اۋدارىلدى.
جيىن قورىتىندىسى بويىنشا ەلىمىزدىڭ تۋريستىك الەۋەتىن ارتتىرۋ، ينۆەستيتسيا تارتۋ جانە حالىقارالىق نارىقتاعى قازاقستاننىڭ بەدەلىن نىعايتۋ ماقساتىندا ناقتى تاپسىرمالار بەرىلدى.
2025-جىلى الماتىدا تۋريزمدى دامىتۋ ءۇشىن نە ىستەلەتىنىن جازعان بولاتىنبىز.