ەلىمىزگە جۇمىرتقانى اۆتوكولىكپەن اكەلۋگە ۋاقىتشا تىيىم سالىنباق
استانا. KAZINFORM -قازاقستانعا تاۋىق جۇمىرتقاسىن اۆتوكولىكتەرمەن اكەلۋگە 6 ايعا تىيىم سالىنادى.
اۋىل شارۋاشىلىعى ءمينيسترىنىڭ اتالعان بۇيرىعى 2024 -جىلعى 1-مامىردان باستاپ قولدانىسقا ەنگىزىلەدى.
«قازاقستان رەسپۋبليكاسىنىڭ اۋماعىنا اۆتوموبيل كولىگىمەن ءۇشىنشى ەلدەردەن جانە ەۋرازيالىق ەكونوميكالىق وداق ەلدەرىنەن تاۋىق جۇمىرتقاسىن (ەۋرازيالىق ەكونوميكالىق وداقتىڭ سىرتقى ەكونوميكالىق قىزمەتىنىڭ تاۋار نومەنكلاتۋرالىق كودى: 040721) اكەلۋگە 6 اي مەرزىمگە تىيىم سالۋ ەنگىزىلسىن»، - دەلىنگەن بۇيرىق ماتىنىندە.
اشىق ن ق ا- عا جاريالانعان بۇيرىق بيىل 1-ناۋرىزعا دەيىن قوعام تالقىسىنا ۇسىنىلىپ وتىر.
ەسكە سالا كەتسەك، 16-اقپاندا ساۋدا جانە ينتەگراتسيا مينيسترلىگى جىل سوڭىنا دەيىن جۇمىرتقا باعاسىن بەكىتۋدى ۇسىنعان ەدى.
ۆەدومستۆو جۇمىرتقا باعاسىن بەكىتۋدى قۇس وسىرۋشىلەر وداعى جانە قازاقستاننىڭ جۇمىرتقا وندىرۋشىلەر اسسوتسياتسياسى، سونداي-اق قۇس فابريكالارىنىڭ باسشىلارىمەن بىرلەسىپ تالقىلاعان.
