ەلىمىز اتوم ەلەكتر ستانساسىن سالۋعا قارجىنى قايدان الماق

استانا. KAZINFORM - ازىرگە اتوم ەلەكتر ستانساسىن سالۋعا قارجىنىڭ قانداي كوزدەن الىناتىنى ناقتى بەلگىسىز. دەگەنمەن ۇلتتىق ەكونوميكا ءمينيسترىنىڭ ورىنباسارى ارمان قاسەنوۆ بىرنەشە الەمدىك تاجىريبەنى مىسالعا كەلتىردى.

- الدىمەن جەتكىزۋشى انىقتالادى، سودان كەيىن جوبا قۇرىلىمى دايىندالادى. سودان سوڭ جوبانىڭ ءوزى، وعان قولدانىلاتىن تەحنولوگيالار مەن ونىڭ قۇنى بويىنشا ناقتىلاۋ جۇمىستارى جۇرگىزىلەدى. ازىرگە بۇل ماسەلەلەر اشىق كۇيدە قالىپ وتىر، ناقتى شەشىم قابىلدانعان جوق. شەشىمدەر بەلگىلى بولعاندا، قارجىلاندىرۋ قانداي قاراجات ەسەبىنەن جۇرگىزىلەتىنىن انىقتايمىز، - دەدى ارمان قاسەنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ۆيتسە-ءمينيستردىڭ مالىمدەۋىنشە، ا ە س قۇرىلىسىنا شەتەلدىك جابدىقتى پايدالانعان جاعدايدا ەكسپورتتىق-نەسيەلىك اگەنتتىكتەر ارقىلى نەسيە قاراستىرىلۋى مۇمكىن.

- مىسالى، قىتايدان جابدىق ساتىپ السا، ونى قارجىلاندىرۋمەن قىتايدىڭ «ەكسيمبانكى» اينالىسادى، گەرمانيادا «گەرمەس» اگەنتتىگى، ال ا ق ش- تا «ەكسيمبانك» بار. ولار الەۋەتتى قارجىلاندىرۋ كوزى بولا الادى. سونىمەن قاتار، حالىقارالىق دامۋ ينستيتۋتتارى دا قارجىلاندىرۋدى قامتاماسىز ەتەتىن ىقتيمال كوزى رەتىندە قاراستىرىلادى. جالپى الەمدىك تاجىريبەدە ەلەكتر ەنەرگەتيكاسى مەن تۇرعىن ءۇي-كوممۋنالدىق شارۋاشىلىق سالاسىنداعى جوبالار تاۋەكەلى تومەن سانالادى. مۇندا قارجىنىڭ تابىلاتىنىنا جانە ونىڭ ءتيىمدى شارتپەن ۇسىنىلاتىنىنا ەشقانداي كۇمان جوق، - دەپ ءتۇسىندىردى ءمينيستردىڭ ورىنباسارى.

ايتا كەتەيىك، ۇكىمەت العاشقى اتوم ەلەكتر ستانساسىن الماتى وبلىسىنىڭ جامبىل اۋدانى اۋماعىندا سالۋ تۋرالى شەشىم قابىلدادى.

پرەمەر-مينيستر ولجاس بەكتەنوۆ ا ە س سالۋدا ەكونوميكالىق تيىمدىلىكتى قامتاماسىز ەتۋ قاجەت ەكەنىن ايتقان بولاتىن.

سونداي-اق ەنەرگەتيكا ءمينيسترى الماسادام ساتقاليەۆ العاشقى اتوم ەلەكتر ستانساسىنىڭ قۇرىلىسى قاشان باستالاتىنىنا قاتىستى پىكىر بىلدىرگەن ەدى.