ۇلىمنىڭ وسى جاقتا ۇيلەنۋىن ارماندايمىن - گەرمانيا قازاعى

شەتەل قازاعى
Фото: baq.kz

 بۇل تۋرالى گەرمانيانىڭ كەلن قالاسىندا تۇراتىن ەۋروپا قازاقتارى قاۋىمداستىعىنىڭ ءتورايىمى ساديا سۇرەر وتانداستار فورۋمىندا ايتتى، دەپ حابارلايدى baq.kz. 

ول 40 جىلدان استام ۋاقىت گەرمانيادا تۇرىپ جاتىر.

مەن 2019 -جىلى بولعان وتانداستار فورۋمىنا دا قاتىسقان بولاتىنمىن. بيىل دا كەلدىم. باسقا دا قانداستاردىڭ باسقوسۋلارىنان قالمايمىن، - دەيدى ساديا سۇرەر.

ول سونداي-اق وتانداستار قورىن اتامەكەنمەن بايلانىستىراتىن التىن كوپىرگە تەڭەدى.

بۇرىن شەتەلدە تۇراتىن قازاقتاردىڭ قۇرىلتايلارى بولعاندا وسىنداي كوپ قاتىناسۋ بولمايتىن ەدى. تەك قانا ءبىرقانشا كىسى كەلىپ، كەتەتىن ەدى. وتانداستار قورى ابزال مىرزا كەلگەننەن بەرى بىزگە التىن كوپىردەي بولىپ تۇر. ويتكەنى ءبىز كوپ ءىس-شارالاردى جوسپارلاپ، جۇزەگە اسىرىپ جاتىرمىز، - دەدى ول.

قازىر وتانداستار قورى شەتەلدەگى قازاقتاردىڭ كەزدەسۋىنە، بىرلەسىپ جۇمىس ىستەۋىنە كومەك بەرىپ جاتقانىن جەتكىزدى.

ءبىز ەكىنشى بۋىن بولىپ وتىرمىز. ءبىز ءۇشىن ەڭ ۇلكەن ماسەلە ءۇشىنشى، ءتورتىنشى بۋىندارعا تۋعان ءتىلىن، ءوزىنىڭ قازاق ەكەنىن ۇمىتتىرماۋ، ادەت- عۇرىپتارىمىزدى، سالت-داستۇرلەرىمىزدى ۇستاپ قالۋىنا مۇمكىندىك جاساۋ، - دەيدى ول.

ساديا سۇرەر ءوز سوزىندە گەرمانياداعى قازاقتاردىڭ ارالاسىپ تۇراتىنىن دا ايتتى.

ءبىز، گەرمانياداعى قازاقتار، ءارقاشان جينالىپ تۇرامىز. ءبىر-ءبىرىمىزدى تانيمىز. قايدا بولساق تا، ءبىر-ءبىرىمىزدى ىزدەيمىز. ءبىز قازاقتىعىمىزدى ۇمىتقان جوقپىز. مەن قازاقستانعا كوشىپ كەلۋدى، ۇلىمنىڭ وسى جاقتا ۇيلەنۋىن ارماندايمىن، - دەدى ول.

سوڭعى جاڭالىقتار