ليفتىدە بالانى پىشاقتاعان جاس ءوسپىرىم ءىسى: تاعى ءبىر قىلمىستىق ءىس قوزعالدى

استانا. KAZINFORM - پسيحيكالىق اۋىتقۋى بار جاس ءوسپىرىمنىڭ اناسى اۋرۋحانادا بالامدى ۇردى دەپ پوليتسياعا شاعىم تۇسىرگەن بولاتىن. اتالعان جايتقا قاتىستى قىلمىستىق ءىس قوزعالدى.

بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ ءمالىم ەتتى.

- كامەلەتكە تولماعان كۇدىكتىگە دەنە جاراقاتىن سالعان سانيتارعا قاتىستى اقپاراتقا كەلەتىن بولساق، بۇل فاكتى بويىنشا سوتقا دەيىنگى تەرگەۋ امالدارى ءجۇرىپ جاتىر. قىلمىستىق ءىس قوزعالدى. قازىر بارلىق ءمان-جايدى انىقتاۋ ءۇشىن كەشەندى تەرگەۋ ءجۇرىپ جاتىر، - دەيدى سانجار ءادىلوۆ ءماجىلىس قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

بۇعان دەيىن ىشكى ىستەر ءمينيسترىنىڭ ورىنباسارى ليفتىدە بالانى پىشاقتاعان جاس ءوسپىرىمنىڭ ءىسى ءبىر اي ىشىندە سوتقا جىبەرۋ جوسپاردا بارىن ايتقان ەدى.

ەسكە سالا كەتەيىك، بيىل 11-اقپاندا ەلوردادا جاس ءوسپىرىم ليفتى ىشىندە بالانى پىشاقتاپ تاستاعان ەدى. كەيىن بەلگىلى بولعانداي پىشاقپەن شابۋىلداعان جاس ءوسپىرىم ارنايى ەسەپتە تۇرعان.

دارىگەرلەر زارداپ شەككەن بالاعا دەرەۋ وتا جاساپ، پسيحولوگيالىق كومەك كورسەتتى.

قازىر بالانى پىشاقتاعان جاس ءوسپىرىم پسيحياتريالىق ستاتسيونارعا ورنالاستىرىلدى.

ءوز كەزەگىندە دەنساۋلىق ساقتاۋ ءمينيسترىنىڭ ورىنباسارى ەرجان نۇرلىبايەۆ جاس ءوسپىرىمنىڭ ورتاعا بەيىم جاعدايدا بولعانىن ايتتى.

سونداي-اق كەيىن انىقتالعانداي ليفتىدە بالانى پىشاقتاعان جاس ءوسپىرىمدى جالعىزباستى انا تاربيەلەپ وتىرعانى بەلگىلى بولدى.

ايتا كەتسەك، ەلوردادا كوپ قاباتتى تۇرعىن ۇيلەردىڭ بىرىندە ليفتىدە بالانى پىشاقتاعان جاس ءوسپىرىمنىڭ اناسى پسيحيكالىق دەنساۋلىق ورتالىعىندا ۇلىن ۇرعانى تۋرالى پوليتسياعا شاعىم تۇسىرگەن ەدى.