ۇلى بريتانيا سوڭعى كومىر ەلەكتر ستانسياسىن جاپتى

لوندون. KAZINFORM - ۇلى بريتانيا كومىردەن ەلەكتر ەنەرگياسىن ءوندىرۋدى توقتاتىپ، قازبا وتىنىنا دەگەن 142 جىلدىق تاۋەلدىلىگىن اياقتادى. ەلدەگى سوڭعى جۇمىس ىستەپ تۇرعان رەتكليفف- ون- سور كومىر ەلەكتر ستانسياسى جۇمىسىن توقتاتتى. بۇل - ۇلى بريتانيانىڭ كليماتتىڭ وزگەرۋىنە قارسى كۇرەس جولىنداعى ماڭىزدى قادامدارىنىڭ ءبىرى، دەپ حابارلايدى Kazinform ءتىلشىسى.

الەمدەگى العاشقى كومىر ەلەكتر ستانسياسى - حولبورن ۆيادۋكتى 1882 -جىلى لوندوندا توماس ەديسون سالعان. بۇل تاريحي وقيعا ۇلى بريتانيادا ونەركاسىپتىك رەۆوليۋتسيا باستاۋعا ىقپال ەتتى. 20- عاسىردىڭ ءبىرىنشى جارتىسىندا كومىر ەلدىڭ بارلىق دەرلىك ەلەكتر ەنەرگياسىن قامتاماسىز ەتتى. ءتىپتى 2012 -جىلى بۇل قازبا وتىنى ۇلى بريتانيانىڭ %39 قۋات كوزىن قۇراعان بولاتىن.

الايدا كليماتتىڭ وزگەرۋىنە قاتىستى عىلىمي دالەلدەر كوبەيگەن سايىن، كومىر لاستاۋشى قۋات كوزى رەتىندە قاراستىرىلدى. ءسويتىپ ۇلى بريتانيا ۇكىمەتى 2015 -جىلى كومىر قۋاتىن ون جىل ىشىندە توقتاتۋعا ۋادە بەردى.

ەڭ ۇزاق قىزمەت ەتكەن قورشاعان ورتا ءمينيسترى لورد دەبەن بۇل كۇندى «ەرەكشە كۇن» دەپ اتاپ، ۇلى بريتانيا كومىرگە تاۋەلدى مەملەكەت بولعانىن جانە ءقازىر ونى ءبىرىنشى بولىپ توقتاتىپ جاتقانىن اتاپ ءوتتى.

كومىردەن تولىعىمەن باس تارتۋ باستاماسى تەز جۇزەگە استى. 2010 -جىلى جاڭارتىلاتىن ەنەرگيا كوزدەرى ۇلى بريتانيا ەلەكتر ەنەرگياسىنىڭ تەك %7 ىن عانا قامتاماسىز ەتسە، 2024 -جىلى بۇل كورسەتكىش %50 دان اسىپ، كومىر جاعۋدى ءبىرجولاتا توقتاتۋعا مۇمكىندىك بەردى. جاسىل ەنەرگياعا كوشۋدىڭ ءساتتى جۇزەگە اسقانى سونشالىق كومىر ەلەكتر ستانسيالارىن جابۋ جوسپارى مەجەدەن بۇرىن ورىندالدى.

اۆتور
عالىمجان قارامان ۇلى