ليۆانداعى اتىس توقتاتىلدى: تۇرعىندار ەلدىڭ وڭتۇستىگىنە ورالىپ جاتىر

استانا. KAZINFORM - يزرايل مەن «حەزبوللا» اراسىنداعى اتىستى توقتاتۋ كەلىسىمى سارسەنبى كۇنى جەرگىلىكتى ۋاقىت بويىنشا 4:00 دە ا ق ش پەن فرانسيانىڭ دەلدالدىعىمەن جاسالعان كەلىسىم قابىلداعاننان كەيىن كۇشىنە ەندى.

سارسەنبى كۇنى تاڭەرتەڭ اسكەريلەر ليۆاندىقتارعا اۋىلدارىنا ورالماۋىن ەسكەرتۋىنە قاراماستان، كولىكتەر لەگى ليۆاننىڭ وڭتۇستىگىنە قاراي اعىلدى.

بۇل كەلىسىم 2023-جىلدىڭ 7-قازانىندا يزرايل وڭتۇستىگىندەگى حاماس شابۋىلىنان كەيىن حەزبوللا باستاعان 14 ايلىق شايقاسقا نۇكتە قويدى.

سەيسەنبى كۇنى كەشكە يزرايلدىڭ اسكەري-ساياسي كابينەتى كەلىسىمدى قولداپ، داۋىس بەردى. ول 60 كۇندىك وتپەلى كەزەڭدى قامتيدى. سول ارالىقتا يزرايل قورعانىس كۇشتەرى ليۆاننىڭ وڭتۇستىگىنەن ءوز اسكەرلەرىن شىعارادى جانە ليۆان ارمياسى ليتاني وزەنىنىڭ وڭتۇستىگىندە 5000 عا جۋىق اسكەردى، سونىڭ ىشىندە يزرايلمەن شەكاراداعى 33 بەكەتتە ورنالاستىرادى.

يزرايل-ليۆان شەكاراسىنداعى قاقتىعىستى توقتاتۋعا ۋادە بەرگەن كەلىسىم دجو بايدەن اكىمشىلىگىنىڭ كەيىنگى كەزدەگى باستى جەتىستىگى سانالىپ وتىر.

- كۇش ديالوگ پەن كەلىسسوزدەرگە جول بەرۋى كەرەك. ليۆاندا بۇعان قول جەتكىزىلدى، ەندى گازا سەكتورىندا مۇمكىندىگىنشە تەزىرەك بولۋى كەرەك، - دەدى فرانسيا سىرتقى ىستەر ءمينيسترى جان-نوەل باررو Franceinfo راديوسىنا بەرگەن سۇحباتىندا.

ەسكە سالا كەتەيىك، بۇعان دەيىن ليۆان مەن يزرايل اراسىنداعى اتىستى توقتاتۋ كەلىسىمى كۇشىنە ەنگەنىن حابارلاعان ەدىك.