ليۆان مەن يزرايل اراسىنداعى اتىستى توقتاتۋ كەلىسىمى كۇشىنە ەندى
استانا. KAZINFORM - ليۆان مەن يزرايل اراسىنداعى اتىستى توقتاتۋ كەلىسىمى ا ق ش- فرانسيا باستاماسىنا سايكەس جەرگىلىكتى ۋاقىت بويىنشا ساعات 04:00 دە ەندى، دەپ حابارلايدى ت ا س س اقپارات اگەنتتىگى.
Al Nahar گازەتىنىڭ حابارلاۋىنشا، قۇجات ب ۇ ۇ- نىڭ ليۆانداعى ۋاقىتشا كۇشتەرىنىڭ قولداۋىمەن وڭتۇستىك شەكارا بويىنشا ليۆان ارمياسىنىڭ بولىمدەرىن كەزەڭ-كەزەڭىمەن ورنالاستىرۋدى قاراستىرادى. ءوز كەزەگىندە يزرايل وڭتۇستىك ليۆاننان اسكەرلەرىن بىرتىندەپ (60 كۇنگە دەيىنگى مەرزىمدە) شىعارادى.
رەسپۋبليكا پرەمەر-ءمينيسترى نادجيب ميكاتي قول جەتكىزىلگەن اتىستى توقتاتۋ كەلىسىمىنە قاناعاتتاناتىنىن ءبىلدىردى. ونىڭ ايتۋىنشا، بۇل كەلىسىم ليۆان-يزرايل شەكاراسىنداعى تۇراقتىلىقتى قايتارادى. ول ۇكىمەتتىڭ ب ۇ ۇ قاۋىپسىزدىك كەڭەسىنىڭ 1701 رەزوليۋتسياسىن ورىنداۋعا دەگەن ۇمتىلىسىن جانە بىرىككەن ۇلتتار ۇيىمى ۋاقىتشا كۇشتەرمەن ىنتىماقتاستىقتا ليۆان ارمياسىنىڭ ەلدىڭ وڭتۇستىگىندە بولۋىن كۇشەيتۋ نيەتىن راستادى.
باسىلىمنىڭ حابارلاۋىنشا، ليۆان بيلىگى ەل اۋماعىنداعى زاڭسىز قارۋلى توپتاردىڭ ارەكەتىنە جانە ولارعا كونتراباندا ارقىلى قارۋ-جاراق جەتكىزىلۋىنە جول بەرمەۋگە مىندەتتەمە الادى. قارۋ مەن وق- ءدارى شىعارۋمەن اينالىساتىن بارلىق زاڭسىز نىساندار جويىلىپ، قارۋ- جاراق قورى تاركىلەنەدى.
بۇعان دەيىن حۋسيتتەر يەمەن ۇكىمەتىمەن تۇتقىنداردى الماسۋعا دايىن ەكەنى حابارلاندى.
