ەلدەگى زاۋىتتار قاي كولىك برەندتەرىن كوبىرەك شىعارىپ جاتىر

الدىن الا دەرەكتەرى بويىنشا 2026-جىلعى قاڭتار-قىركۇيەكتە قازاقستاندا 146541 اۆتوكولىك تەحنيكاسى جاسالدى. بۇل بىلتىرعى سايكەس كەزەڭدەگىدەن (109223) 34,2 پايىزعا كوپ. قىركۇيەكتە قازاقستاندىق كاسىپورىندار 20215 تەحنيكا شىعاردى، بۇل كورسەتكىش 2025 -جىلعى قىركۇيەككە (13021) قاراعاندا 55,2 پايىزعا، ال بيىلعى تامىزبەن (15267) سالىستىرعاندا %32,4 ارتىق.

- توعىز اي قورىتىندىسى بويىنشا قازاقستانداعى اۆتوونەركاسىپ جوعارى دامۋ قارقىنىن ساقتاپ تۇر. سالا ينۆەستيتسياعا قولايلى: وندىرۋشىلەر قازاقستانداعى ورنىن نىعايتىپ، جاڭا جوبالارىن جۇزەگە اسىرىپ جاتىر. ولاردىڭ اراسىندا الماتىدا OMODA جانە JAECOO اۆتوكولىكتەرىن ءوندىرۋ جوبالارى جانە قوستانايدا Li Auto اۆتوكولىكتەرىن شىعارۋعا دايىندىق بار. كۇزدە لوكاليزاتسيانى دامىتۋ بويىنشا كوپتەگەن كەلىسىمگە قول قويىلدى. تەحنولوگيالىق وپەراتسيالاردى تەرەڭدەتۋ مەن ەل ىشىندە اۆتوكومپونەنتتەر ءوندىرىسىن كەڭەيتۋ اۆتوونەركاسىپتىڭ قازاقستان ەكونوميكاسىنا قوساتىن ۇلەسىن مىعىم ەتەدى ءارى ارتتىرادى، - دەپ ءتۇسىندىردى ق ا و پرەزيدەنتى انار ماقاشيەۆا.

قاي برەندتەر كوپ قۇراستىرىلدى؟

توعىز اي قورىتىندىسى بويىنشا قوستانايداعى Allur («سارىارقااۆتوپروم») زاۋىتى 56130 تەحنيكا شىعاردى. الماتىداعى Astana Motors Manufacturing Kazakhstan Changan, Chery جانە Haval برەندتەرىنىڭ 40245 اۆتوكولىگىن قۇراستىردى. Hyundai Trans Kazakhstan كاسىپورنى — 27305، Kia Qazaqstan زاۋىتى 13782 اۆتوكولىك شىعاردى.

ودان بولەك، توعىز ايدا «سەماز» - 2293، QazTehna — 2014, Hyundai Trans Auto - 998، «كاماز- ينجينيرينگ» — 804، Orbis Machinery — 433، Daewoo Bus Kazakhstan — 379، « ورالاگرورەمماش» 158 تەحنيكا جاسادى.

اناعۇرلىم كوپ شىققان برەندتەر وندىعىنا Chevrolet (29555 كولىك) ، Hyundai (27275)، Kia (17712) Changan (15148) ، Chery (12593) ،Haval (10955) ، Jetour (6907) ، JAC (4753) Geely Galaxy (3378) جانە MG (2497 كولىك) كىردى.

ءمينيستردىڭ مالىمدەۋىنشە، وتاندىق اۆتوموبيل ونەركاسىبىن ودان ءارى دامىتۋ جانە ونىڭ باسەكەگە قابىلەتتىلىگىن ارتتىرۋ ماقساتىندا مينيسترلىك نەگىزگى باعىتتاردى ايقىندادى. ولار:

- لوكاليزاتسيا دەڭگەيىن ودان ءارى ارتتىرۋ. ول ءۇشىن نەگىزگى باسىمدىق - جاڭا اۆتوكومپونەنتتەر ءوندىرىسىن يگەرۋگە جانە وتاندىق كاسىپورىنداردى الەمنىڭ جەتەكشى اۆتوكولىك كومپانيالارىنىڭ ءوندىرىس تىزبەكتەرىنە ەنگىزۋ جوسپارلانىپ وتىر.

- حالىق ءۇشىن اۆتوكولىكتىڭ قولجەتىمدىلىگىن ارتتىرۋ. وسى ماقساتتا اۆتونەسيەلەۋ مەن ليزينگ تەتىكتەرىن جەتىلدىرۋ، ونىڭ ىشىندە بورىشتىق جۇكتەمە كوەففيتسيەنتىن الىپ تاستاۋ جانە جەكە تۇلعالارعا ارنالعان اۆتوليزينگتى دامىتۋ كوزدەلگەن.

- ەلەكتر جانە گيبريدتى كولىك قۇرالدارى ءوندىرىسىن دامىتۋ، سونداي-اق ولاردى پايدالانۋعا قاجەتتى ينفراقۇرىلىمدى قالىپتاستىرۋ. بۇل زاريادتاۋ ستانتسيالار جەلىسىن كەڭەيتۋدى، پيلوتسىز كولىك تەحنولوگيالارىن قولدانۋ ءۇشىن قاجەتتى جاعدايلار جاساۋدى قامتيدى.

- مەنشىكتى زەرتحانالىق بازانى قۇرۋ. بۇل اۆتوكولىك پەن اۆتوكومپونەنتتەردىڭ تەحنيكالىق تالاپتارعا سايكەستىگىن ەل ىشىندە راستاۋعا، جاڭا ونىمدەردى نارىققا جەدەل شىعارۋعا جانە وتاندىق ءوندىرىستىڭ دامۋىنا ىقپال ەتەدى.

بۇعان دەيىن قازاقستاندا ەلەكتروموبيلدى ساتىپ الۋ قارقىنى ارتقانىن جازعان ەدىك.