«ۇلى كوشكە-35 جىل»: حالىقارالىق كورمەگە تاريحي جادىگەرلەر قابىلدانادى
استانا.قازاقپارات - 2027 -جىلعى 12-اقپاندا استانا قالاسىنداعى تۇڭعىش پرەزيدەنت مۋزەيىندە دۇنيەجۇزى قازاقتارىنىڭ العاشقى قۇرىلتايى مەن ۇلى كوشتىڭ 35 جىلدىعىنا ارنالعان حالىقارالىق تاريحي-ەتنوگرافيالىق كورمە وتەدى.
وسىعان وراي دۇنيەجۇزى قازاقتارى قاۋىمداستىعى قازاقستانداعى جانە شەتەلدەگى قانداستاردى كورمەگە تاريحي جادىگەرلەر مەن وتباسىلىق قۇندى مۇرالاردى ۇسىنۋعا شاقىرادى.
كورمەنىڭ باستى ماقساتى - شەتەلدەگى قازاقتاردىڭ تاريحي تاعدىرىن، اتامەكەنگە ورالۋ جولىنداعى وقيعالاردى، ۇلتتىق سالت-ءداستۇرى مەن مادەني مۇراسىن كەڭىنەن تانىستىرۋ. سونىمەن قاتار تاريحي جادىگەرلەردى جيناقتاپ، ساقتاۋ جانە ولاردى كەلەر ۇرپاققا جەتكىزۋ كوزدەلگەن.
ۇيىمداستىرۋشىلار كورمەگە ۇلى كوش تاريحىنا قاتىستى ءتۇرلى تاريحي جانە مادەني قۇندىلىقتاردى قابىلدايدى. ولاردىڭ قاتارىندا كونە قۇجاتتار، حاتتار، شەجىرەلەر، قولجازبالار، ەسكى فوتوسۋرەتتەر مەن بەينەجازبالار، وتباسىلىق ارحيۆتەر بار.
سونداي-اق ۇلتتىق كيىمدەر، شاپاندار، كيمەشەكتەر، تىماقتار، كىلەمدەر، سىرماقتار، تەكەمەتتەر، زەرگەرلىك اشەكەيلەر، قولونەر جانە تۇرمىستىق بۇيىمدار، دومبىرا، قوبىز سەكىلدى ۇلتتىق مۋزىكالىق اسپاپتار، ات ابزەلدەرى، تاريحي ماراپاتتار مەن ەستەلىك زاتتار دا كورمەگە ۇسىنىلا الادى.
بۇدان بولەك، ۇلى كوشكە قاتىسقان ازاماتتاردىڭ ءومىرباياندارى مەن ەستەلىكتەرى دە جيناقتالادى.
جادىگەر ۇسىنۋ ءۇشىن WhatsApp ارقىلى ونىڭ اتاۋىن، 2-3 فوتوسۋرەتىن، قاي كەزەڭگە جانە قاي وڭىرگە تيەسىلى ەكەنىن، كىمگە تيەسىلى بولعانى مەن قىسقاشا تاريحىن، ۇلى كوشپەن بايلانىسىن جولداۋ قاجەت. سونىمەن بىرگە ۇسىنۋشىنىڭ اتى- ءجونى مەن بايلانىس ءنومىرى كورسەتىلۋى ءتيىس.
تاريحي جادىگەرلەردى كورمەگە ۋاقىتشا پايدالانۋعا بەرۋگە نەمەسە سىيعا تارتۋعا بولادى. قۇجاتتار مەن فوتوسۋرەتتەردىڭ ەلەكتروندىق نۇسقالارى دا قابىلدانادى. جادىگەردى ۇسىنعان ازاماتتىڭ نەمەسە اۋلەتتىڭ ەسىمى ولاردىڭ كەلىسىمىمەن كورمە ەكسپوزيتسياسىندا كورسەتىلۋى مۇمكىن.
ماتەريالداردى قابىلداۋ مەرزىمى - 2027 -جىلعى 20-قاڭتارعا دەيىن.
ۇيىمداستىرۋشىلاردىڭ مالىمەتىنشە، ءاربىر وتباسىندا ساقتالعان كونە سۋرەت، حات، ۇلتتىق بۇيىم نەمەسە اتامەكەنگە ورالۋ كەزەڭىنەن قالعان ەستەلىك - حالقىمىزدىڭ ورتاق تاريحىنىڭ ءبىر بولشەگى. سوندىقتان كورمە باستاماسى ۇلى كوش تاريحىنا قاتىستى قۇندى دەرەكتەر مەن جادىگەرلەردى ءبىر ارناعا توعىستىرۋعا مۇمكىندىك بەرەدى.
جادىگەرلەردى ۇسىنۋ جانە قوسىمشا اقپارات الۋ ءۇشىن تومەندەگى بايلانىس نومىرىنە حابارلاسۋعا بولادى:
WhatsApp: +77755377772.
دۇنيەجۇزى قازاقتارى قاۋىمداستىعى بارشا وتانداستار مەن شەتەلدەگى قانداستاردى تاريحي-مادەني باستاماعا اتسالىسىپ، حابارلاندىرۋدى كەڭىنەن تاراتۋعا شاقىرادى.
