ۇلى بريتانيادا ۆيرۋستىڭ جاڭا ءتۇرى تاراپ جاتىر

ۇلى بريتانيادا كوۆيدتىڭ جاڭا ءتۇرى تاراپ، دارىگەرلەردىڭ الاڭداۋشىلىعىن تۋعىزدى. رەسمي مالىمەتتەرگە سايكەس انگليا مەن شوتلانديادا ءاربىر 24- ادام ۆيرۋستى جۇقتىرعان، دەپ حابارلايدى Kazinform ءتىلشىسى.

شامامەن 150 مىڭ ادام ۇيدەن تەست سىناماسىن جاساپ، وسىنداي ناتيجە كورسەتىپ وتىر. ۆيرۋستىڭ جاس تالعامايتىنى انىقتالعان.

ءبىراق ول 65 جاستان اسقان ادامداردان گورى 18 بەن 44 جاس ارالىعىنداعى تۇرعىنداردان كوبىرەك تابىلعان. ناۋقاستار، اسىرەسە، لوندوندا كوپ.

دۇنيەجۇزىلىك دەنساۋلىق ساقتاۋ ۇيىمى بۇل ۆيرۋستى زەرتتەۋدى قاجەت ەتەتىن وميكروننىڭ جاڭا ءتۇرى دەپ، وعان JN.1 دەگەن اتاۋ بەردى.

ونىڭ سولتۇستىك جانە وڭتۇستىك امەريكادا، تىنىق مۇحيتىنىڭ باتىس بولىگىندە جانە ەۋروپا ەلدەرىندە كەڭىنەن تاراعانى بەلگىلى بولىپ وتىر.

«كوۆيد، ادەتتەگىشە، ءبىزدى تاڭ قالدىرىپ جاتىر. الدىن الا بولجاۋ قيىن اۋرۋ بولعاندىقتان ساقتىق شارالارىن جاساعان ءجون»، - دەيدى ۆيرۋسولوگ عالىم لوۋرەنس يانگ.

قازىرگى تاڭدا JN.1 اسا قاۋىپتى ەكەندىگىن دالەلدەيتىن ازىرگە زەرتتەۋ ناتيجەلەرى جوق.

كوۆيدكە قارسى ۆاكسينالاردىڭ جاڭارتىلعان تۇرلەرى ادام اعزاسىنىڭ يممۋنيتەتىن كۇشەيتەدى دەيدى ماماندار.

ءبىراق دۇنيەجۇزىلىك دەنساۋلىق ساقتاۋ ۇيىمىنداعىلار ناۋقاستار سانىنىڭ ارتۋى مۇمكىن ەكەندىگىن جوققا شىعارمايدى.

ويتكەنى قىس مەزگىلىندە ءورشيتىن باسقا ۆيرۋستىق جانە باكتەريالدى ينفەكسيالار جىعىلعانعا جۇدىرىق بولىپ تۇر.