ۇلى بريتانيادا دۇكەن ۇرلىعى رەكوردتىق دەڭگەيگە ءوستى

استانا. KAZINFORM - انگليا مەن ۋەلستە دۇكەندەردەن ۇساق ۇرلىق سانى رەكوردتىق كورسەتكىشكە جەتتى - كۇنىنە 1200-گە جۋىق قىلمىس جاسالعان، ال پوليتسيا اشقان ىستەردىڭ سانى ەڭ تومەنگى دەڭگەيگە دەيىن قىسقاردى - ءتارتىپ ساقشىلارى 10 وقيعانىڭ ءبىرىن عانا اشا الدى.

ۇلى بريتانيا ۇلتتىق ستاتيستيكا قىزمەتىنىڭ مالىمەتىنشە، وتكەن جىلى 430104 دۇكەن ۇرلاۋ وقيعاسى جاسالعان. بۇل الدىڭعى جىلداعى 315040 وقيعاعا قاراعاندا 37 پايىز كوپ. بۇل - پوليتسەيلەر قىلمىستىڭ وسى ءتۇرىن تىركەي باستاعاننان بەرگى دۇكەن ۇرلىعىنىڭ ەڭ كوپ سانى.

The Telegraph گازەتىنىڭ ۇلى بريتانيانىڭ ىشكى ىستەر مينيسترلىگى مالىمەتتەرىنە سىلتەمە جاساي وتىرىپ حابارلاۋىنشا، كۇدىكتىلەرگە دۇكەن ۇرلىعى ءۇشىن ايىپ تاعىلعان ىستەردىڭ ۇلەسى 2016 -جىلعى 27,7 پايىزبەن سالىستىرعاندا 15 پايىزدان 10,5 پايىزعا دەيىن تومەندەگەن.

بريتاندىق بولشەك ساۋدا كونسورتسيۋمىنىڭ مالىمدەۋىنشە، ۇرلىقتان بولعان شىعىن ەكى ەسە، 1,8 ميلليارد فۋنت ستەرلينگكە دەيىن وسكەن، ال دۇكەن قىزمەتكەرلەرىنە زورلىق-زومبىلىق كورسەتۋ نەمەسە قورلاۋ جاعدايلارى كۇنىنە 870 دەن 1300 گە دەيىن ارتتى.

جەكە تۇلعالاردان ۇرلىق جاساۋ دا 2004 -جىلدان بەرگى ەڭ جوعارى دەڭگەيگە جەتتى، 2023 -جىلى 125563 قىلمىس بولدى، بۇل 2022 -جىلعى كورسەتكىشتەن 18 پايىزعا كوپ. الايدا 170 ءىستىڭ بىرىندە عانا ۇرىلار جاۋاپقا تارتىلادى.

وتكەن جىلى پوليتسەيلەر تىركەگەن توناۋ سانى 2022 -جىلمەن سالىستىرعاندا 13 پايىزعا (81094 وقيعا) ءوستى، ءبىراق بۇل قىلمىس تۇرلەرىن تىركەۋ تاجىريبەسى باستالعان 2003 -جىلمەن سالىستىرعاندا 26 پايىزعا تومەن بولىپ قالىپ وتىر.

اۆتور

زارينا تۋعانبايەۆا