ۇلى بريتانيا ۋكرايناداعى بىتىمگەرشىلىك ميسسياسىنا قاتىساتىن ەرىكتىلەر ىزدەيدى

استانا. KAZINFORM – ۇلى بريتانيا بىتىمگەرشىلىك كەلىسىمگە قول جەتكىزىلگەن جاعدايدا ۋكرايناعا قولداۋ كورسەتەتىن «نيەتتىلەر كواليتسياسىن» قۇرىپ جاتىر، ءبىراق بارلىق ەلدەر اسكەر جىبەرۋگە دايىن ەمەس، دەپ حابارلايدى Kazinform ءتىلشىسى.

سەنبى، 15-ناۋرىزدا ۇلى بريتانيا پرەمەر-ءمينيسترى كير ستارمەر رەسەي مەن ۋكراينا اراسىنداعى قاقتىعىستى بەيبىت جولمەن شەشۋگە كومەكتەسۋگە دايىن ەلدەردىڭ باسشىلارىمەن ونلاين كەزدەسۋ وتكىزەدى. ول بىتىمگەرشىلىك ميسسياسى تۋرالى بەلسەندى پىكىرتالاس اياسىندا وتەدى.

ستارمەر «نيەتتىلەر كواليتسياسىنا» نەگىزىنەن ەۋروپا ەلدەرى مەن ۇلتتار دوستاستىعى مۇشەلەرىن، ۇلى بريتانيا مەن ونىڭ بۇرىنعى كولونيالارىن قامتيتىن مەملەكەتتەر توبىن جيناپ جاتىر.

قاتىسۋشىلاردىڭ تۇپكىلىكتى ءتىزىمى ءالى انىقتالعان جوق، ءبىراق بريتان بيلىگىنىڭ مالىمەتىنشە، 20 عا جۋىق مەملەكەت سوعىس قيمىلدارى توقتاتىلعان جاعدايدا ۋكرايناعا قولداۋ كورسەتۋ نۇسقالارىن تالقىلاپ جاتىر.

بۇعان دەيىن ۇلى بريتانيا مەن فرانسيا بىتىمگەرشىلىك كەلىسىمنىڭ ورىندالۋىن باقىلاۋ ءۇشىن ۋكرايناعا اسكەر جىبەرۋگە دايىن ەكەندىكتەرىن مالىمدەگەن. بۇل كۇشتەرگە قالالار مەن ستراتەگيالىق ماڭىزدى نىسانداردىڭ، سونىڭ ىشىندە ەلەكتر ستانسيالارىنىڭ قاۋىپسىزدىگىن قامتاماسىز ەتۋ مىندەتى جۇكتەلەدى، دەپ جازادى Financial Times گازەتى.

الايدا، «نيەتتىلەر كواليتسياسىنىڭ» بارلىق مۇشەلەرى ءوز اسكەرىن جىبەرۋگە كەلىسە بەرمەيدى. مىسالى، پولشا لوگيستيكالىق قولداۋ كورسەتۋگە دايىن ەكەنىن ءبىلدىردى، ال باسقا ەلدەر كومەك فورماتىن ءالى شەشكەن جوق. كوپتەگەن ەلدەر رەسمي بەيبىت كەلىسىمگە قول قويۋدى جانە ا ق ش- تىڭ جاۋابىن كۇتىپ وتىر.

ستارمەر بىتىمگەرشىلىك كەلىسىمىنىڭ شارتتارىن ورىنداۋ بويىنشا اسكەري ميسسيانىڭ تابىستى بولۋى امەريكا قۇراما شتاتتارىنىڭ قولداۋىنا، سونىڭ ىشىندە اۋە قورعانىسى مەن بارلاۋ مونيتورينگىنە بايلانىستى ەكەنىنە سەنىمدى. الايدا پرەزيدەنت دونالد ترامپ بۇل يدەيانى قولدامادى.

ترامپ سونىمەن بىرگە سوعىستى توقتاتۋدى تالاپ ەتىپ، كيەۆكە اسكەري كومەك پەن اقپارات الماسۋدى توقتاتۋعا قىسىم جاسادى. بۇعان جاۋاپ رەتىندە ۇلى بريتانيا مەن فرانسيا ۆاشينگتونعا ۇسىنىلۋى مۇمكىن بەيبىتشىلىك جوسپارىن ازىرلەۋگە تىرىسىپ جاتىر.

بۇعان دەيىن رەسەي سىرتقى ىستەر ءمينيسترى سەرگەي لاۆروۆ ناتو اسكەرلەرىنىڭ ۋكرايناعا كىرۋ مۇمكىندىگىنە الاڭداۋشىلىق ءبىلدىرىپ، مۇنى اليانستىڭ قاقتىعىسقا تىكەلەي ارالاسۋى رەتىندە قابىلداۋعا بولاتىنىن اتاپ ءوتتى، دەپ جازادى تاسس.

بۇعان دەيىن ساۋد ارابياسىندا ۋكراينا-امەريكا كەلىسسوزدەرى ءوتىپ جاتقانى، ونىڭ بارىسىندا ۋكراينا ا ق ش- قا رەسەيمەن ءىشىنارا اتىستى توقتاتۋ جوسپارىن ۇسىناتىنى حابارلانعان بولاتىن.