ۇلى بريتانيا جاعالاۋىندا مۇناي تانكەرى مەن جۇك كەمەسى سوقتىعىستى

استانا. KAZINFORM - شىعىس يوركشير جاعالاۋىندا، حالل قالاسىنا جاقىن جەردە ەكى كەمە سوقتىعىستى. ونىڭ ءبىرى جۇك كەمەسى، ەكىنشىسى مۇناي تانكەرى، دەپ حابارلايدى Kazinform BBC اقپارات اگەنتتىگىنە سىلتەمە جاساپ.

سوقتىعىس سالدارىنان ەكى كەمەدە دە ءورت شىقتى. ادامدار ەۆاكۋاتسيالانىپ جاتىر. لوندون ۋاقىتى بويىنشا 13:39 داعى (استانا ۋاقىتى بويىنشا 18:39) جاعداي بويىنشا 32 ادام جاعاعا شىعارىلدى. ازىرگە ولاردىڭ جاعدايى بەلگىسىز.

ۇلى بريتانيا جاعالاۋ كۇزەتى قىزمەتىنىڭ حابارلاۋىنشا، دابىل جەرگىلىكتى ۋاقىت بويىنشا تاڭعى ساعات 9:48 دە (استانا ۋاقىتى بويىنشا 14:48) كوتەرىلگەن. BBC اقپارات كوزدەرىنىڭ حابارلاۋىنشا، مۇناي تانكەرى ورتەنىپ كەتكەن، كەيىن ەكىنشى كەمەدەگى ءورت تۋرالى اقپارات پايدا بولعان.

سوقتىعىسقان كەمەلەر امەريكالىق Stena Immaculate تانكەرى مەن پورتۋگاليا جالاۋى ىلىنگەن سولونگ كونتەينەرلىك كەمەسى بولۋى مۇمكىن.

تەڭىزدەگى كولىك قوزعالىسىن قاداعالايتىن MarineTraffic ۆەب- سايتىنىڭ حابارلاۋىنشا، گرەتسيانىڭ اگيا تەودوري پورتىنان شىققان Stena Immaculate ساعات 09:48 دە حالل قالاسىنىڭ ماڭىندا زاكىر قالدى. وسى كەزدە شوتلانديانىڭ گرەنجمۋت پورتىنان كەلە جاتقان سولونگ وعان جاقىندادى. سوقتىعىس بولعان كورىنەدى.

وقيعا ورنىنا جاقىن ماڭداعى ەلدى مەكەندەردەن قۇتقارۋ تىكۇشاعى مەن قۇتقارۋ قايىقتارى، سونداي- اق جاعالاۋ كۇزەتىنىڭ ۇشاعى جىبەرىلدى. ءورتتى سوندىرۋگە ارنالعان جابدىقتارى بار جاقىن ماڭداعى كەمەلەر كومەككە كەلەدى.

تەڭىزدەگى قوزعالىستى باقىلايتىن MarineTraffic ۆەب- سايتىنا قاراعاندا، جاقىن جەردە تاعى بىرنەشە كەمە بار.