لوس-اندجەلەستەگى ورمان ورتىنەن بەس ادام قازا بولدى
استانا. KAZINFORM - كاليفورنيا بيلىگىنىڭ حابارلاۋىنشا، ورمان ورتىنەن قازا تاپقاندار سانى بەس ادامعا جەتتى، دەپ حابارلايدى BBC.
- بۇگىن ءبىز ەكى ادامنىڭ ولگەنى تۋرالى حابارلاعان ەدىك. وكىنىشكە قاراي، ولاردىڭ سانى بەس ادامعا جەتتى، - دەدى لوس- اندجەلەس وكرۋگىنىڭ شەريفى روبەرت لۋنا.
ونىڭ ايتۋىنشا، جالىن ءالى اۋىزدىقتالعان جوق، زارداپ شەككەندەر سانى ارتۋى مۇمكىن. جاعدايدى قاتتى جەل مەن قۇرعاق اۋا رايى قيىنداتىپ وتىر.
بيلىك لوس-اندجەلەس ايماعىندا بەس ورمان ءورتى جالعاسىپ جاتقانىن، ال ەۆاكۋاتسيا ايماقتارىندا 150 مىڭ ادام تۇراتىنىن حابارلادى.
سانتا-مونيكا مەن ماليبۋ اراسىنداعى پاسيفيك-پاليسەيدس ايماعىندا ەڭ ۇلكەن ءورت اۋماعى 60 شارشى شاقىرىمنان اسادى.
لوس- اندجەلەس وكرۋگى ءورت ءسوندىرۋ ءبولىمىنىڭ باستىعى ەنتوني ماررونەنىڭ ايتۋىنشا، ءورت كەم دەگەندە 1000 قۇرىلىمدى قيراتتى.
لوس-اندجەلەس وكرۋگىنىڭ باتىسىنداعى ماليبۋدا كوپتەگەن اتاقتى ادامداردىڭ ۇيلەرى ورنالاسقان.
سارسەنبى كۇنى TMZ اكتريسا جانە ءانشى پەريس حيلتونعا تيەسىلى ماليبۋ جاعاجايىنداعى ۇيلەردىڭ ءبىرى تولىعىمەن ورتەنىپ كەتكەنىن حابارلادى.
كەيىنىرەك مۇنى حيلتوننىڭ ءوزى راستادى.
TMZ سونىمەن قاتار ۇيلەرى ورتتەن زارداپ شەككەن لوس- اندجەلەستىڭ باسقا دا تانىمال تۇرعىندارى تۋرالى حابارلايدى.
بەيسەنبىگە قاراعان كۇنى تۇندە وتكەن باسپا ءسوز ءماسليحاتىندا بيلىك لوس-اندجەلەستىڭ ەڭ تانىمال اۋداندارىنىڭ ءبىرى، گولليۆۋدتىڭ ايگىلى بەلگىسى ورنالاسقان گولليۆۋد توبەشىگى ايماعىندا تاعى ءبىر ءورت شىققانىن حابارلادى.
وسىعان دەيىن لوس-اندجەلەستىڭ باتىسىندا ورمان ورتەنىپ، 10 مىڭعا جۋىق ۇيگە ءقاۋىپ تونگەنىن حابارلاعان ەدىك.
