لوس-اندجەلەس مەرى ا ق ش بيلىگىن قالانى «تاجىريبە الاڭى» ەتتى دەپ ايىپتادى
استانا. KAZINFORM - لوس-اندجەلەس مەرى كارەن باسس فەدەرالدى ۇكىمەتتىڭ ۇلتتىق گۆارديا مەن تەڭىز جاياۋ اسكەرلەرىن تارتا وتىرىپ قالادا تارتىپسىزدىكتەرگە قارسى ءىس-قيمىل جۇرگىزۋىن سىنادى.
ول بۇل قادامدى «قالامىزدى تاجىريبە الاڭى رەتىندە پايدالانۋ» دەپ باعالادى.
جۋرناليستەر الدىندا سويلەگەن سوزىندە باسس پرەزيدەنت دونالد ترامپتىڭ لوس-اندجەلەسكە اسكەر كىرگىزۋ تۋرالى شەشىمىن ءتۇسىندىرىپ ءوتتى. ونىڭ ايتۋىنشا، ترامپ اكىمشىلىگى باستاپقىدا رەيدتەر تەك قىلمىسكەرلەر مەن قاماۋعا الۋ تۋرالى وردەرى بار ادامدارعا باعىتتالادى دەپ مالىمدەگەن. الايدا ءىس جۇزىندە بيلىك وكىلدەرى ادامداردى تىكەلەي جۇمىس ورىندارىنان ۇستاپ جاتىر.
- بىزگە ناقتى كىمدەردىڭ قاماۋعا الىناتىنى تۋرالى اقپارات بەرىلگەن جوق. مەنىڭشە، ءبىزدىڭ قالانى تاجىريبە ءۇشىن قولدانىپ وتىر، - دەدى باسس.
لوس- اندجەلەستە ا ق ش- تىڭ كوشى- قون جانە كەدەن قىزمەتى (ICE) ۇستاعان زاڭسىز ميگرانتتاردى قولداۋعا باعىتتالعان نارازىلىقتار جالعاسىپ جاتىر. بۇل شەرۋلەر جاپپاي قاماۋلار مەن پوليسيامەن قاقتىعىستارعا ۇلاسۋدا.
پرەزيدەنت ترامپ ۇلتتىق گۆارديانى ءتارتىپتى قالپىنا كەلتىرۋ ماقساتىندا ەنگىزىپ جاتقانىن مالىمدەدى. ول قالالىق جانە شتاتتىق بيلىكتى دەموكرات گۋبەرناتور مەن قالا اكىمشىلىگىن قوعامدىق ءتارتىپتى قامتاماسىز ەتە المادى دەپ ايىپتادى.
ايتا كەتەلىك نيۋ-يوركتە يمميگراتسيالىق رەيدتەرگە قارسى نارازىلىق اكتسياسى وتكەن ەدى.
بۇعان دەيىن ا ق ش بيلىگى نارازىلىق بىلدىرۋشىلەر مەن قاۋىپسىزدىك كۇشتەرى اراسىنداعى قاقتىعىس كەزىندە لوس-اندجەلەسكە تاعى 2000 ۇلتتىق گۆاردياشى مەن 700 تەڭىز جاياۋ اسكەرىن جىبەرىپ جاتقانى حابارلانعان.
