ەلوردانىڭ مادەني ۇيىمدارى «ۇلتتىق كيىم» كۇنىنە اۋقىمدى فلەشموب وتكىزدى
استانا. KAZINFORM - ەلوردادا «اتامەكەن» قازاقستان كارتاسى» ەتنو-مەموريالدىق كەشەنىندە «ۇلتتىق كيىم» كۇنىنە ارنالعان ۇلكەن فلەشموب ءوتتى. وعان استانالىق مادەنيەت باسقارماسىنا قاراستى تەاترلار مەن فيلارمونيالار، مۋزەي جانە كىتاپحانا قىزمەتكەرلەرى قاتىستى.
بيىل ۇلىستىڭ ۇلى كۇنى ءاز ناۋرىزدى 10 كۇن تويلاۋ ۇسىنىلدى جانە 18- ناۋرىز - «ۇلتتىق كيىم» كۇنى بولىپ بەلگىلەنگەن. قازاقتىڭ ۇلتتىق كيىمى - قازاق مادەنيەتىنىڭ ماڭىزدى جانە اجىراماس اتريبۋتى ىسپەتتەس.
ۇلتتىق كيىمدەردى ۇلىقتاۋ ماقساتىندا وتكىزىلەتىن شاراعا 500 گە جۋىق مادەنيەت قىزمەتكەرى قاتىسقان. ولاردىڭ قاتارىندا تانىمال ونەر جۇلدىزدارى مەن تەاتر ارتىستەرى دە بار.
«بۇل كۇندى ەڭ الدىمەن قازاقتىڭ تامىرى تەرەڭ مادەنيەتى - ويۋ-ورنەكپەن باستاعىمىز كەلدى. فلەشموبتىڭ ۇستىنەن قاراعاندا «قوشقار ءمۇيىز» ويۋىن بايقاۋعا بولادى. وزدەرىڭىز بىلەتىندەي، ۇلىتاۋ وبلىسىندا بولعان انا كەسەنەسىنەن سوناۋ XIII- XIV عاسىرعا تيەسىلى التىن توستاعان تابىلعان ەدى. سول توستاعاننىڭ تۇبىندە قىزعالداق ورنەگى اشەكەيلەنگەن سۋرەت تابىلدى. سول قىزعالداقتى اپالارىمىز ءالى كۇنگە دەيىن كورپەگە، تەكەمەتكە ورنەك ەتىپ تىگەدى. مۇنداي مادەني ەلەمەنتتەرىمىزدىڭ ءالى كۇنگە دەيىن وزگەرىسسىز ساقتالۋى - قازاقتىڭ ەجەلدەن كەلە جاتقان باي مادەنيەتىن كورسەتەدى. سوندىقتان دا، قازاقتىڭ ويۋ-ورنەگىن ۇلتتىق كيىم كۇنىمەن بايلانىستىرىپ، ەل الدىنا ۇسىنىپ وتىرمىز»، - دەدى مەملەكەتتىك «ناز» ءبي تەاترىنىڭ ديرەكتورى ەركەبۇلان اعىمبايەۆ اگەنتتىك تىلشىسىنە بەرگەن سۇحباتىندا.
سونىمەن بىرگە، تەاتر ديرەكتورى بۇگىندە تاقيا، شاپان، كامزول، ساپتاما ەتىك كيىمدەرى ەل اراسىندا كەڭىنەن تاراعانىن، «ۇلتتىق كيىمدى تەك قانا ناۋرىزدا كيەدى» دەگەن قاساڭ تۇسىنىكتىڭ جوعالعانىن اتاپ ءوتتى.
«قازىرگى تاڭدا ۇلتتىق كيىمدەر كۇندەلىكتى تۇرمىستا دا كوپ كيىلەدى. ماسەلەن ءوزىم مىنا شاپاندى كۇندە كيەمىن. بۇل وتە جاقسى ءۇردىس دەۋگە بولادى. بۇگىنگى قاتىسۋشىلاردىڭ دا كيىمدەرىنە زەر سالساڭىز، ءبارى تەاترلارعا تيەسىلى. ونىڭ نۇسقالارى، ديزاينى ويدان شىعارىلماعان، مۋزەي مۇراعاتىنان، تاريحي كىتاپتاردان الىپ تىگىلگەن. وسىلايشا بۇگىن ۇلتتىق قۇندىلىقتى ناسيحاتتاۋ، ۇلتتىق مادەنيەتكە سۇيىسپەنشىلىك سەزىمىن وياتىپ، وتانسۇيگىشتىككە تاربيەلەۋ، ءتول ونەردى دامىتىپ، ونەرپازدارى توپتاستىراتىن شىعارماشىلىق الاڭ جاساۋدى ماقسات ەتتىك»، - دەيدى ەركەبۇلان اعىمبايەۆ.
مەملەكەتتىك «ناز» بي تەاترىنىڭ بالەت ءارتىسى ءمادينا كوشۋمبايەۆا دا - فلەشموب قاتىسۋشىلارىنىڭ ءبىرى. ونىڭ ۇلتتىق كوستيۋمى «ناۋرىز» دەپ اتالادى.
«بۇل كيىم سىرتتا وتەتىن مادەني ءىس-شارالار ءۇشىن ارنايى تىگىلگەن ءارى ءبىزدىڭ ايماقتىڭ ايازدى اۋا رايى ءۇشىن وتە جىلى كيىم. بىزدە بارلىق كيىم تابيعي، قىمبات ماتەريالدان قولمەن تىگىلەدى، ماسەلەن جاعاسى مەن جەڭى تۇلكىنىڭ تەرىسىنەن جاسالعان. جاسىل - كوكتەمنىڭ، جاڭا ءومىردىڭ ءتۇسى بولسا، قىزىل - جاس داۋرەننىڭ، دۋمان- مەرەكەنىڭ بەلگىسىندەي. ودان بولەك، «ناۋرىز» كوستيۋمىنە حالقىمىزدىڭ ۇلتتىق سيمۆولدارى زەرلەپ سالىنعان، اسىرەسە كوكتەمنىڭ العاشقى گۇلى بايشەشەك ورنەگىنە باسا ءمان بەرىلگەن. ۇلتتىق كيىمدەرىمىزگە ءجىتى كوڭىل بولىنگەنى ەرەكشە قۋانتادى»، - دەيدى تەاتر ءارتىسى.
