ەلوردانىڭ «استانا» كومانداسىنا قىتايلىق ينۆەستورلار تارتىلادى

استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ ەلوردانىڭ ۆەلوكومانداسىنا قولداۋ كورسەتۋ ءۇشىن شەتەلدىك ينۆەستورلارمەن ىنتىماقتاستىق ماسەلەسىن تالقىلادى.

تۋريزم جانە سپورت مينيسترلىگىنىڭ مالىمەتىنشە، قىتايدىڭ جەتەكشى XDS كومپانياسىنىڭ وكىلدەرى - لي سيانروگ (Li Xiangrong) جانە ليۋ ۆەيمەن (Lu Wei) Astana Qazaqstan Team ۆەلوكومانداسىنا قولداۋ كورسەتۋگە دايىن ەكەنىن ايتقان.

كەزدەسۋ بارىسىندا ەربول مىرزابوسىنوۆ شەتەلدىك سەرىكتەستەرمەن ىنتىماقتاستىقتىڭ قازاقستان ۆەلوسپورتى ءۇشىن جاڭا مۇمكىندىكتەر اشاتىنىن اتاپ ءوتتى.

«Astana Qazaqstan Team - جاي عانا ۆەلوكوماندا ەمەس، قازاقستاننىڭ ۇلتتىق ماقتانىشى ءارى سپورتتىق مۇراسىنىڭ سيمۆولى. شەتەلدىك ينۆەستورلاردىڭ ءبىزدىڭ ۆەلوكوماندانى قولداۋى الەمدىك ارەناداعى ورنىمىزدى نىعايتا تۇسەدى»، - دەدى مينيستر.

جيىنعا تۋريزم جانە سپورت ۆيتسە-ءمينيسترى سەرىك جاراسبايەۆ، وليمپيادا چەمپيونى، Astana Qazaqstan Team كومانداسىنىڭ باس مەنەدجەرى الەكساندر ۆينوكۋروۆ قاتىستى.

قىتايلىق ينۆەستورلار بەلسەندى ىنتىماقتاستىققا دايىن ەكەندىكتەرىن جەتكىزىپ، جوبادا تەك كوممەرتسيالىق الەۋەتتى ەمەس، سونىمەن قاتار قازاقستان مەن قىتاي اراسىنداعى دوستىق جانە سپورتتىق بايلانىستاردى نىعايتۋ مۇمكىندىگىن دە قاراستىراتىندارىن ايتتى.