ەلوردالىق زاعيپ وقۋشى لوندوندا توپ جاردى
لوندون. KAZINFORM - كوزى كورمەيتىن ەلوردالىق وقۋشى لوندوندا وتكەن «التىن ۋاقىتتىڭ دارىنى» دەپ اتالاتىن ونەر بايقاۋىندا باس جۇلدەنى جەڭىپ الدى.
ابىلاي مۇستافين حالىقارالىق كونكۋرستا قازاقستاندىق اۆتورلاردىڭ شىعارمالارىن فورتەپيانودا ورىنداپ، شەتەلدىك قازىلاردىڭ جوعارى باعاسىنا يە بولدى، دەپ حابارلايدى Kazinform ءتىلشىسى.
ابىلاي - استاناداعى جۇمابەك تاشەنوۆ اتىنداعى مەكتەپ- گيمنازياسىنىڭ 9-سىنىپ وقۋشىسى. ول سونداي-اق روزا باعلانوۆا اتىنداعى 2- مۋزىكالىق مەكتەپتە ءبىلىم الادى. تۋعانىنان كوزى كورمەيتىن ءبىرىنشى توپتاعى مۇگەدەك بولسا دا، مۇمكىندىگىنىڭ شەكتەۋسىز ەكەنىن دالەلدەدى. بۇعان دەيىن حابار تەلەارناسىنان كورسەتىلگەن «جۇلدىزاي» بايقاۋىندا لاۋرەت اتانسا، بۇگىن حالىقارالىق ونەر دوداسىندا توپ جاردى.
«مەن جەڭىمپاز بولىپ ۇتىپ جاتقانىما باقىتتىمىن. وسىنداي مۇمكىندىك سىيلاعانى ءۇشىن مۋزىكالىق مەكتەپ ءمۇعالىمى ولەسيا يۆانوۆناعا، انام مەن اكەمە راقمەت»، - دەيدى بايقاۋدىڭ باس جۇلدەگەرى ابىلاي مۇستافين.
ابىلاي ەسەپكە دە جۇيرىك. گەرمانيادا جانە تۇركيادا مەنتالدى اريفمەتيكادان وتكەن وليمپيادادا توپ جارىپ، جۇلدەلى ورىنعا يە بولدى. جاس ورەن بولاشاعىن IT تەحنولوگيالارمەن بايلانىستىرعىسى بار. بايقاۋدا الماتىلىق سۋرەتشى اسەمگۇل سۇلەيمەنوۆا دا باس جۇلدەنى قانجىعالادى.
«مەنىڭ باستى ماقساتىم وسى قازاقي ونەردى، قازاقي ناقىشتاعى سۋرەتتەرىمدى الەمگە تانىتۋ جانە وسى بىزدە قازاقستاندا ونەر ادامدارى كوپ ەكەنىن، بار ەكەنىن ءبىلدىرۋ»، - دەيدى بايقاۋدىڭ باس جۇلدەگەرى اسەمگۇل سۇلەيمەنوۆا.
بايقاۋدا باق سىناعانداردىڭ 30 پايىزى وتانداستارىمىز. ماسەلەن، اعايىندى گۇلىماي، دىنمۇحاممەد، نۇرباقىت تالاپ ساحناعا شىعىپ، ۇلتتىق ونەرىمىزدى پاش ەتتى. دومبىرادا ويناپ، قازاق كۇيىن كۇمبىرلەتتى. بايقاۋعا بالالارمەن قاتار كاسىپقوي مۋزىكانتتار دا قاتىستى. ارالارىندا قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى دا بار.
«ەڭ بىرىنشىدەن، ءبىزدىڭ ۇرلەمەلى اسپاپ كۆينتەتىمىزگە 20 جىل تولىپ جاتىر وسى جىلى. سوعان ارناپ ادەيى كەلىپ جاتىرمىن. قازاقستاندى تانىتۋعا، قازاقستاندى ءبىلسىن، كورسىن دەگەن ويمەن كەلىپ جاتىرمىز»، - دەدى قازاقستاننىڭ ەڭبەك سىڭىرگەن قايراتكەرى جانات ەرمانوۆ.
ءتورتىنشى جىل قاتارىنان ءوتىپ جاتقان «التىن ۋاقىتتىڭ دارىنى» اتتى حالىقارالىق بايقاۋدىڭ ۇيىمداستىرۋشىسى ۋكراينا ازاماتتارى. ولار مۋزىكا، بەينەلەۋ ونەرى، حورەوگرافيا جانە باسقا دا اتالىمدار بويىنشا ونلاين ىرىكتەۋدەن وتكەن 25 ەلدىڭ وكىلىن ۇلىبريتانياعا شاقىرعان. بايقاۋعا قاتىسۋ اقىلى. ودان بولەك ۆيزا جانە جول شىعىندارى بار. وتانداستارىمىزدىڭ لوندونعا كەلۋىنە دەمەۋشىلەر قولداۋ كورسەتكەن.
«ۇلكەن دارىن يەلەرىنە ارنالعان ءدۇبىرلى دودالار كوپ. ءبىزدىڭ بايقاۋعا ءوزىن ءالى تانىتىپ ۇلگەرمەگەن، ءبىراق تالانتتى ونەر ادامدارى قاتىسادى. بەس جاسار بالادان باستاپ، 70-تەن اسقان اقساقالعا دەيىن ساحناعا شىعىپ جاتىر» ، — دەيدى بايقاۋ ۇيىمداستىرۋشىسى يننەسسا بيلا.
جەڭىمپازداردىڭ ەسىمدەرى بايقاۋدىڭ رەسمي سايتىنداعى ۇزدىكتەر تىزىمىنەن تابىلادى. وزىق وقۋ ورىندارىنان شاقىرۋلار الىپ، شەتەلدىك كومپانيالار ولارعا قىزمەتتەر ۇسىنۋى ىقتيمال. دارىندىلار ۆيزاسىنا يە بولىپ، ۇلىبريتانيا مەن اقش- تا ونەرلەرىن شىڭداۋعا دا مۇمكىندىك بار، دەيدى ۇيىمداستىرۋشىلار.
اۆتور
عالىمجان قارامان ۇلى
