ەلوردادا ەپيدەميولوگيالىق جاعداي تۇراقتى ما - باس سانيتار جاۋاپ بەردى

استانا. KAZINFORM - ەلوردادا 11 دەرت بويىنشا سىرقاتتانۋ تومەندەگەن، ال 7 سىرقات ءتۇرى بويىنشا دەرتكە شالدىعۋدىڭ ءوسۋى بايقالادى. بۇل تۋرالى استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا ءمالىم ەتتى.

«بيىل 6 ايدىڭ ىشىندە ينفەكسيالىق، پارازيتتىك، كارانتيندىك جانە اسا قاۋىپتى ينفەكسيالار بويىنشا ەپيدەميولوگيالىق جاعداي تۇراقتى. الدىن الۋ شارالارىنىڭ ارقاسىندا ەلوردا اۋماعىندا اسا قاۋىپتى جانە كارانتيندىك اۋرۋلار تىركەلگەن جوق. 11 نوزولوگيا بويىنشا سىرقاتتانۋشىلىقتىڭ تومەندەۋى بايقالادى. اتاپ ايتقاندا، ك ۆ ي 12 ەسە، ەنتەروۆيرۋستىق ينفەكسيا 9,3 ەسە، سەروزدى مەنينگيت 3 ەسە، ج ر ۆ ي 2 ەسە، B ۆيرۋستىق گەپاتيتىنىڭ ءجىتى ءتۇرى %43 عا تومەندەدى. سونداي-اق سكارلاتينا، B جانە C ۆيرۋستىق گەپاتيتىنىڭ سوزىلمالى تۇرلەرى، سالمونەللەز، تۇماۋ، ديزەنتەريا سەكىلدى دەرتتەردىڭ ازايۋى بايقالادى»، - دەدى سارحات بەيسەنوۆا استانا قالاسىنىڭ كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ەلوردانىڭ باس سانيتار دارىگەرىنىڭ ايتۋىنشا، C گەپاتيتى، وپيستورحوز، ءىرىڭدى مەنينگيت جانە مەنينگوكوك ينفەكسياسى بويىنشا دا جاعداي قالىپتى.

«الايدا، جۇرگىزىلىپ جاتقان جۇمىستارعا قاراماستان، 7 نوزولوگيا بويىنشا سىرقاتتانۋشىلىقتىڭ ءوسۋى بايقالىپ وتىر. مىسالى، كوكجوتەل 81 ەسە، قىزىلشا 12 ەسە، پاروتيت 3 ەسە، ۆيرۋستىق A گەپاتيتى 1,5 ەسە، روتاۆيرۋستىق ينفەكسيا %17، جەدەل ىشەك ينفەكسياسى %13,9 جانە تۋبەركۋلەز %11 ءوستى» ، - دەيدى ول.

بۇعان دەيىن شەتەلگە شىعاتىن استانالىقتارعا ۆاكسينا الۋ ۇسىنىلعانىن جازعان ەدىك.

اۆتور
داۋلەت ىزتىلەۋ