ەلوردادا تۇرعىن ءۇي سالىپ جاتقان كومپانيا اكىمدىكتى سوتقا بەردى
استانا. KAZINFORM - استانا قالاسىنىڭ كاسىپكەرلەر قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستىڭ كەزەكتى وتىرىسىندا مەملەكەتتىك ورگانداردىڭ قۇرىلىسقا كەلتىرىپ وتىرعان اكىمشىلىك كەدەرگىلەرى تالقىلاندى.
شاعىمدانۋشىلاردىڭ ءبىرى - ابىلاي حان داڭعىلى مەن ع. مۇسىرەپوۆ كوشەسىنىڭ قيىلىسىندا بوي كوتەرۋگە ءتيىس بولعان 8 قاباتتى تۇرعىن ءۇيدىڭ مەنشىك يەسى. «اتامەكەن» ۇلتتىق كاسىپكەرلەر پالاتاسىنىڭ استاناداعى بولىمشەسىنە «Fiesta Hall» جاۋاپكەرشىلىگى شەكتەۋلىگى سەرىكتەستىگى قالالىق قورشاعان ورتانى قورعاۋ جانە تابيعات پايدالانۋ باسقارماسى كاسىپكەرلىك سالاسىنداعى زاڭنامانى ورەسكەل بۇزىپ وتىرعانى تۋرالى شاعىم تۇسىرەدى.
سەرىكتەستىك يەسى قوس كىرەبەرىسى بار، استىڭعى قاباتى جابىق كولىك تۇراعىنا بەرىلەتىن، تۇرعىن اۋماعى 8 قاباتتى تۇرعىن ءۇي سالۋ ءۇشىن 24 سوتتىق جەر ساتىپ الىپ، قاجەتتى قۇجاتتاردىڭ ءبارىن راسىمدەگەن. «اتامەكەن» ۇ ك پ انىقتاماسىندا قۇرىلىسقا قاجەتتى قۇجاتتاردىڭ ءبارى زاڭعا سايكەس راسىمدەلگەنى ايتىلعان. ءتيىستى ساراپتامالاردىڭ بارىنەن ءوتىپ، قۇرىلىس-مونتاج جۇمىستارىن باستاۋعا رۇقسات بەرەتىن تالون دا العان.
بيىلعى 12-قاراشادا سەرىكتەستىك استانا قالاسىنىڭ قورشاعان ورتانى قورعاۋ جانە تابيعات پايدالانۋ باسقارماسىنا ءوزى ساتىپ العان جەردە ءوسىپ تۇرعان اعاشتاردى كەسۋگە رۇقسات بەرۋىن سۇراپ، ءوتىنىش تۇسىرەدى.
ءۇش كۇن وتكەندە باسقارما اعاشتاردى كەسۋگە رۇقسات بەرمەيتىنىن حابارلاپ، جاۋاپ قاتادى. وعان استانا قالاسى الماتى اۋدانى اكىمدىگىنىڭ كاسىپكەرگە تيەسىلى جەر تەلىمىنىڭ پايدالانۋ ماقساتىن «تۇرعىن ۇيدەن»، «سكۆەرگە» اۋىستىرۋ تۋرالى ءوتىنىشى نەگىز بولعان.
ال 17-جەلتوقساندا اتالعان جەر تەلىمىنىڭ تاعدىرىن ايقىنداۋ ءۇشىن قوعامدىق تىڭداۋ وتكىزۋ جوسپارلانىپ وتىر. كاسىپكەر قوعامدىق تىڭداۋ تەلىمدى سكۆەر اۋماعىنا قوسۋ تۋرالى شەشىم قابىلدانسا، قۇرىلىسقا دەپ سالعان، جەر ساتىپ الۋعا جۇمساعان قاراجاتى وتەۋسىز قالادى دەپ الاڭدايتىنىن ايتقان.
كەڭەستە وسى داۋعا قاتىستى مەملەكەتتىك ورگانداردىڭ وكىلدەرى مەن «Fiesta Hall» ج ش س باسشىلارى كەزەك-كەزەك ءسوز الىپ، ءوز ۋاجدەرىن ايتتى.
سەرىكتەستىكتىڭ زاڭگەرى ادىلەت يلياشيەۆ وسى نىسانعا كاسىپكەر قازىردىڭ وزىندە 200 ميلليون تەڭگەدەن استام قاراجات جۇمساعانىن ايتادى.
ساۋلەت، قالا قۇرىلىسى جانە جەر قاتىناستارى باسقارماسى باسشىسىنىڭ ورىنباسارى باقتيار ءىلياسوۆ كاسىپكەر تاراپىنان زاڭعا قايشى ارەكەت بولماعانىن، ماسەلە تۇرعىندار قارسىلىعىندا ەكەنىن ايتادى.
اتالمىش اۋدانداعى بىرنەشە تۇرعىن سكۆەردىڭ بويىنا تاعى ءبىر ءۇي سالىناتىنىنا قارسىلىق تانىتىپ، بىرنەشە رەت جيىن وتكىزگەن.
- سەرىكتەستىڭ ادال جۇمىس ىستەپ جاتقانىنا ەشقانداي كۇمان جوق. ءبارى زاڭدى نەگىزدە دەپ ايتا الامىز. بۇل جەردە پروبلەما سول اۋدانداعى تۇرعىنداردىڭ قارسىلىعىندا جانە قالانىڭ جاڭا باس جوسپارى بويىنشا جەر تەلىمى سكۆەر اۋماعىنا قوسىلۋ كەرەك. ءبىز ۇسىنا الاتىن جالعىز جول - ورنىنا باسقا جەر تەلىمىن بەرۋ. قالا اۋماعىندا بەرۋگە بولاتىن بەس جەر تەلىمدەرى بار. ءبىراق ولار بۇل نىسان سياقتى قالانىڭ ورتاسىندا ەمەس، شەتكەرى اۋداندارىندا ورنالاسقان، - دەدى ول.
سونداي-اق، ول استانانىڭ باس جوسپارى ۇكىمەت قاۋلىسىمەن بەكىتىلگەندىكتەن، ونى وزگەرتۋگە اكىمدىك باسقارماسىنىڭ قۇزىرەتى جەتپەيتىنىن ەسكە سالدى.
اكىمدىك ماماندارى اتالعان اۋداننىڭ 15-20 تۇرعىنى ۇنەمى كوشەگە شىعىپ، جيىن وتكىزىپ، تۇرعىن ءۇيدىڭ سالىنۋىنا ءۇزىلدى-كەسىلدى قارسىلىق ءبىلدىرىپ جۇرگەنىن ايتتى.
استانا قالاسىنىڭ كاسىپكەرلەر قۇقىقتارىن قورعاۋ جانە سىبايلاس جەمقورلىققا قارسى ءىس- قيمىل جونىندەگى كەڭەستىڭ مۇشەسى قانات ەلەۋسىزوۆ ترياتلون پاركىنىڭ اۋماعىنان BI Group كومپانياسى ەكى ءۇيدى سالىپ باستاعاندا دا حالىق قارسى شىققانىن، ءبىراق ول كەزدە كاسىپكەردىڭ پايداسىنا شەشىم قابىلدانعانىن مىسالعا كەلتىردى.
- ول كەزدە دە حالىق ميتينگىگە شىعىپ، ءتىپتى كومپانيا باسشىسىنىڭ وزىنە دە بارعانىن بىلەسىزدەر. ءبىراق سوعان قاراماستان قۇرىلىس ءجۇرىپ جاتىر عوي. سونداي ادەمى ساياباقتىڭ ىرگەسىنە ءۇي جاپسىرۋ نە ءۇشىن كەرەك بولدى؟ سوندا بىرەۋگە حالىق قارسىلىعىنا قاراماستان ءۇي سالۋعا بولادى، ال بۇل ادامدارعا بولماي ما؟ سوندىقتان اكىمدىكتىڭ ماسەلەنى شەشۋ ءتاسىلى دۇرىس ەمەس دەپ ويلايمىن، - دەدى ساراپشى.
كەڭەس مۇشەلەرى اتالعان پروبلەما بويىنشا استانا قالاسى اكىمىنىڭ اتىنا ماسەلەنى شەشۋدىڭ ورنىنا ۋشىقتىرىپ جىبەرگەن قالا اكىمىنىڭ ءبىرىنشى ورىنباسارىنىڭ ارەكەتىن مۇقيات قاراۋدى تالاپ ەتۋ تۋرالى حات جولداۋعا كەلىستى. ال كاسىپكەر اكىمدىكپەن سوتتاسقان جاعدايدا «اتامەكەن» كاسىپكەرلەر پالاتاسىنىڭ زاڭگەرلەرىن ىسكە تارتىپ، قولداۋ كورسەتۋ تۋرالى شەشىم قابىلدادى.
كەڭەس مۇشەلەرىنىڭ ىشىندە باس جوسپاردىڭ وزگەرەتىنىن بىلە وتىرىپ، قۇرىلىسقا رۇقسات بەرگەن، سونىڭ سالدارىنان كاسىپكەردى تىعىرىققا تىرەپ قويعان مەملەكەتتىك ورگانداردى سوتقا بەرۋدى ۇسىنعاندار بولدى. اكىمدىكتىڭ ارەكەتى زاڭسىز ەكەنىن دالەلدەنسە، كاسىپكەر بۇعان دەيىنگى ۋاقىتى مەن قارجىلاي شىعىنعا قوسا كەشىكتىرىلگەن تابىستى دا تالاپ ەتە الاتىنى ايتىلدى.
- وسى دۇيسەنبىدە استانا قالاسىنداعى مامانداندىرىلعان اۋدانارالىق اكىمشىلىك سوتىنا جۇگىنىپ، قورشاعان ورتانى قورعاۋ جانە تابيعات پايدالانۋ باسقارماسىنىڭ ۇستىنەن شاعىم تۇسىردىك. بۇعان دەيىن باس پروكۋراتۋراعا دەيىن جازباشا جۇگىنىپ كوردىم. بۇكىل ءوتىنىشىم ەڭ اياعىندا اكىمدىككە كەلىپ تۇسەدى. ەندى سول سوتتىڭ وتىنىشكە قانداي جاۋاپ بەرەتىنىن كۇتىپ وتىرمىز. وسى اپتادا جاۋاپ بەرۋى كەرەك بولعان، - دەيدى كاسىپكەر.
ەسكە سالساق، كەشە الماتىدا تاعى ءبىر تۇرعىن ءۇي كەشەنى سوت شەشىمىمەن ءسۇرىلىپ جاتقانى ءمالىم بولدى.
ەسىمجان ناقتىباي
