ەلوردادا تۇرعىن ءۇي داۋى، سالىقتىق قاتىناس بويىنشا اكىمشىلىك ءىس ءجيى قوزعالادى

استانا. KAZINFORM - ەلوردادا سوت ورىنداۋشىلار ءىسى، تۇرعىن ءۇي داۋى، سالىقتىق قاتىناس بويىنشا اكىمشىلىك ىستەر ءجيى قوزعالادى. بۇل تۋرالى استانا قالالىق سوتىنىڭ اكىمشىلىك ىستەر جونىندەگى سوت القاسىنىڭ ءتوراعاسى دامير ابدىعاليەۆ ايتىپ بەردى.

«ەلوردادا قارالعان اكىمشىلىك ىستەردى تالداۋ حالىق ءۇشىن بيلىك ورگاندارىمەن ءوزارا ءىس- قيمىلدىڭ اناعۇرلىم سەزىمتال سالالارىن انىقتاۋعا مۇمكىندىك بەرەدى. بۇرىنعىسىنشا، كوبىنەسە ازاماتتار مەن زاڭدى تۇلعالار اكىمشىلىك سوت ءىسىن جۇرگىزۋ شەڭبەرىندە سوت ورىنداۋشىلارىنىڭ ارەكەتتەرى مەن اكتىلەرىنە داۋ ايتادى. بۇل سالا اتقارۋشىلىق ءىس جۇرگىزۋگە قاتىساتىندار ءۇشىن وزەكتى بولىپ قالا بەرەدى. اسىرەسە اكىمشىلىك راسىمدىك- پروتسەستىك اياسىندا سوت ورىنداۋشىلارىنىڭ ءاربىر ءىس- ارەكەتىنە (نەمەسە ارەكەتسىزدىگىنە) جانە اكتىلەرىنە داۋ ايتۋعا بولاتىنىن ەسكەرۋ كەرەك»، - دەدى د. ابدىعاليەۆ استانا كوممۋنيكاتسيالار قىزمەتىندە وتكەن بريفينگىدە.

سپيكەر ايتقانداي، بۇل سانات بويىنشا ىستەر سانى ازايىپ كەلەدى، 2021 -جىلعى دەرەكتەرگە سايكەس، كەلىپ تۇسكەن تالاپتاردىڭ جالپى سانىنىڭ 42 پايىزدى قۇراسا، 2023 -جىلى بۇل كورسەتكىش 33 پايىز بولدى، ياعني، 10 پايىز تومەندەۋ بار. سونداي- اق سوت ورىنداۋشىلارى جىبەرىلگەن قاتەلىكتەردى مويىنداۋ، تۇزەتۋ جولىمەن سوتتا ءجيى تاتۋلاسادى.

«اكىمشىلىك ىستەردىڭ ەداۋىر بولىگىن قالا اكىمدىگى مەن ونىڭ باسقارمالارىنا قاتىستى ىستەر قۇرايدى. قوردىڭ مەملەكەتتىك تۇرعىن ۇيلەرىنەن تۇرعىن ءۇي الۋ، كەزەكتە تۇرعانداردىڭ ءتىزىمىن جۇرگىزۋ، تۇرعىن ءۇي تولەمدەرىن الۋ ماسەلەلەرى الەۋمەتتىك تۇرعىدان وتە ماڭىزدى بولىپ قالا بەرەدى. وسى ساناتتار بويىنشا شاعىمدار دا وسۋدە. ماسەلەن، 2021 -جىلى ىستەردىڭ جالپى سانىنىڭ 4,6 پايىزى عانا تۇرعىن ءۇي داۋلارى بولسا، 2022 -جىلى بۇل كورسەتكىش 5,1 پايىز، 2023 -جىلى - 7 پايىزعا دەيىن كوبەيدى»، - دەيدى ول.

وكىنىشكە قاراي، ستاتيستيكا تالاپتاردىڭ نەگىزدىلىگى جىل سايىن ءوسىپ كەلە جاتقانىن كورسەتەدى. مىسالى، ەگەر 2021 -جىلى تالاپتاردىڭ 56 پايىز، 2022 -جىلى - 50 پايىزى قاناعاتتاندىرىلسا، 2023 -جىلى تالاپتاردى قاناعاتتاندىرۋ كورسەتكىشى 78 پايىزدى قۇرادى.

«بۇل اكىمشىلىك ورگان جۇمىسىندا جۇيەلىك قاتەلىكتەر بار ەكەنىن، ءاربىر داۋلى ماسەلەنى شەشۋگە جەكە كوزقاراستىڭ جوقتىعىن كورسەتەدى. ەلوردالىق اكىمشىلىك سوت تاجىريبەسىندە سالىقتىق قۇقىقتىق قاتىناستار مەن مەملەكەتتىك ساتىپ الۋ سالاسىنداعى داۋلار دا ءجيى بولادى. بۇل كاسىپكەرلەر ءۇشىن وتە وزەكتى. مۇندا دا ءوسىم بايقالادى. 2021 -جىلى ولاردىڭ پايىزدىق ارا قاتىناسى 9 پايىز بولسا، 2023 -جىلى - 12 پايىزعا جەتكەن. وسى سانات بويىنشا قاناعاتتاندىرىلعان تالاپتار دا 2021 -جىلى 41,5 پايىزدان 2023 -جىلى 78,9 پايىزعا دەيىن وسكەن»، - دەدى دامير ابدىعاليەۆ.