ەلوردادا تۇندە قاتىنايتىن اۆتوبۋستار پايدا اكەلمەيدى - پارك باسشىسى

استانا. KAZINFORM - استانادا ماۋسىم ايىنان بەرى تۇنگى اۆتوبۋستار قاتىناپ جاتىر.

«تۇندە قاتىنايتىن اۆتوبۋستار پايدا اكەلمەيدى، بۇل الەۋمەتتىك جوبا. ءبىزدىڭ پاركتەن تۇندە 3 باعدار بويىنشا 6 اۆتوبۋس جۇرەدى. قوعامدىق كولىكتەر وڭ جانە سول جاعالاۋ ارالىعىندا قاتىنايدى. ءبىز تۇنگى اۆتوبۋستاردىڭ باعىتى بويىنشا تالداۋ جاساپ، حالىقتىڭ سۇرانىسىن ەسكەردىك»، - دەدى ەلورداداعى №1-اۆتوبۋس پاركىنىڭ باسقارما ءتوراعاسى ماديار تۇقپاتوۆ باسپا ءسوز تۋرى بارىسىندا.

ونىڭ ايتۋىنشا، تۇنگى اۆتوبۋستار حالىق ءجيى قاتىنايتىن جانە تىعىز ورنالاسقان باعدارلار بويىنشا جۇرەدى.

ايتا كەتەيىك، بيىل ماۋسىمنان باستاپ ەلوردادا تۇنگى اۆتوبۋستار قاتىناي باستادى. ولار ساعات 00:00-دەن باستاپ، تاڭعى 06:00-گە دەيىن جۇرەدى.

بۇعان دەيىن پارك باسشىسى استانادا جولاۋشىلاردىڭ 30-40 پايىزى اقى تولەمەي جۇرەتىنىن ايتقان ەدى.

كۇزدە ەلوردانىڭ ءبىرىنشى اۆتوبۋس پاركى 100 كولىكپەن تولىعادى.

اۆتور
داۋلەت ىزتىلەۋ