ەلوردادا ەرەسەكتەر اراسىندا قىزىلشا ءورشىپ تۇر
استانا. KAZINFORM - ەلوردادا قىزىلشامەن سىرقاتتانعانداردىڭ 68 پايىزى اۋرۋعا قارسى ەكپە الماعان. بۇل جايىندا استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا ايتتى.
«ەلوردادا قىزىلشا اۋرۋىنىڭ تىركەلۋى ءالى دە جالعاسۋدا. قاڭتار ايىنىڭ باسىنان باستاپ ەلوردادا قىزىلشانىڭ 1890 باستاپقى جانە 532 راستالعان جاعدايى تىركەلدى. ونىڭ ىشىندە 14 جاسقا دەيىنگى بالالار اراسىندا - 381 جاعداي. ەلوردادا ينفەكسيانىڭ تارالۋىن قىزىلشاعا قارسى ەكپە الماعان ادامدار جالعاستىرۋدا. سىرقاتتانعانداردىڭ 68 پايىزىن وسى كىسىلەر قۇرايدى»، - دەدى ول استانا قالاسىنىڭ كوممۋنيكاتسيالار قىزمەتىندە وتكەن بريفينگتە.
ونىڭ دەرەگىنشە، جەلتوقسان ايىمەن سالىستىرعاندا بالالار اراسىندا سىرقاتتانۋشىلىقتىڭ ءبىر جاسقا دەيىن، ءبىر جاس جانە 2 جاستاعى بالالار اراسىندا تومەندەۋى بايقالادى.
«ماسەلەن، 1 جاسقا دەيىنگى اۋىرعان بالالاردىڭ قارقىندى كورسەتكىشى 692,7 دەن 589,4 كە دەيىن نەمەسە 15 پايىزعا، ءبىر جاستاعى بالالاردا 880,2 دەن 805,3 كە دەيىن نەمەسە 8,5 پايىزعا جانە 2 جاستاعى بالالاردا 701,6 دان 551,9 عا دەيىن نەمەسە 21,3 پايىزعا تومەندەدى. كورسەتىلگەن جاستاعى سىرقاتتانۋدىڭ تومەندەۋى - بۇل قوسىمشا جاپپاي يممۋنداۋدىڭ ناتيجەسى. الايدا، ەرەسەكتەر اراسىندا سىرقاتتانۋشىلىقتىڭ ءوسۋى بايقالادى. قارقىندى كورسەتكىش 25,2 دەن 40,2 گە دەيىن نەمەسە 37,3 پايىزعا ارتتى»، - دەدى سارحات بەيسەنوۆا.
