ەلوردادا ناسىباي وندىرەتىن جەراستى سەحتار اشكەرەلەندى

полиция
فوتو: استانا قالاسى اكىمدىگىنىڭ باسپا ءسوز قىزمەتى

استانا. KAZINFORM - ەلوردانىڭ بارلىق اۋداندارىندا 18-ناۋرىزدان باستاپ ۆەيپ پەن ناسىبايدىڭ زاڭسىز تارالۋى مەن قولدانىلۋىن انىقتاۋ ماقساتىندا رەيدتەر جۇرگىزىلىپ جاتىر. ناتيجەسىندە ءبىرقاتار زاڭسىز ءىس-ارەكەتتەر بەلگىلى بولدى. بۇل تۋرالى استانا اكىمدىگىنىڭ رەسمي سايتى جازدى.

«رەيد باستالعاننان بەرى ەلوردانىڭ بەس اۋدانىندا 700 گە جۋىق ساۋدا نۇكتەلەرى تەكسەرىلدى. پوليتسيا دەپارتامەنتىنىڭ قىزمەتكەرلەرى اۋدان اكىمدىكتەرىمەن بىرلەسىپ، شەكپەيتىن تەمەكى ونىمدەرىن، ونىڭ ىشىندە ناسىباي ءوندىرىسى بويىنشا جەراستى سەحتارىن ساتۋدىڭ 145 فاكتىسىن انىقتادى. استانا بويىنشا قۇنى 20 ميلليون تەڭگەدەن اساتىن 4 توننا ناسىباي تاركىلەندى. تاركىلەنگەن بارلىق ءونىم جويىلدى»، - دەلىنگەن حابارلامادا.

رەيدتىك ءىس-شارالار اپتالىعىندا نۇرا اۋدانىندا 90 عا جۋىق دۇكەن تەكسەرىلدى.

«18-26-ناۋرىز ارالىعىندا نۇرا اۋدانى اكىمدىگى اپپاراتىنىڭ كاسىپكەرلىك ءبولىمىنىڭ قىزمەتكەرلەرى اۋداندىق پوليتسيا باسقارماسىمەن بىرلەسىپ رەيد جۇرگىزدى. ءىس-شارا بارىسىندا اسفەندياروۆ، انەت بابا، سىعاناق، ر. باعلانوۆا، ۇلى دالا جانە يساتاي باتىر كوشەلەرىندە ورنالاسقان ناسىبايدى زاڭسىز ساتۋ بويىنشا 87 دۇكەندە پروفيلاكتيكالىق تۇسىنىكتەمەلەر جۇرگىزىلدى. سونداي-اق 6 دۇكەنگە 25 ايلىق ەسەپتىك كورسەتكىش مولشەرىندە ايىپپۇل سالىندى. بۇگىنگى تاڭدا 20 عا جۋىق دۇكەنگە تەكسەرۋ جۇرگىزىلىپ، ساتۋشىلارعا تۇسىنىكتەمەلەر بەرىلدى. رەيدتەر 31 ناۋرىزعا دەيىن جالعاسادى»، - دەدى نۇرا اۋدانى اكىمدىگىنىڭ كاسىپكەرلىك ءبولىمىنىڭ باس مامانى بەكتەمىر جولجاسقاجييەۆ.

بايقوڭىر اۋدانىندا ساۋدا نۇكتەلەرىندە جەدەل-پروفيلاكتيكالىق ءىس-شارالار جۇرگىزىلىپ جاتىر.

اۋدان پوليتسياسىنىڭ ۋچاسكەلىك ينسپەكتورىنىڭ ايتۋىنشا، شەكپەيتىن تەمەكى ونىمدەرىن زاڭسىز ساتاتىن ساۋدا نۇكتەلەرىنە جانە ۆەيپ ساتۋشىلارعا اكىمشىلىك حاتتاما مەن 25 ايلىق ەسەپتىك كورسەتكىش نەمەسە 92300 تەڭگە كولەمىندە ايىپپۇل سالىنادى.

سارىارقا اۋدانىندا جەدەل-پروفيلاكتيكالىق ءىس-شارالار بارىسىندا 23 كاسىپكەرلىك نىسانى زەرتتەلدى. ونىڭ ىشىندە 2 دۇكەن يەسىنە ايىپپۇل سالىندى. سونىمەن قاتار اۋدان بويىنشا 60 كەلىگە جۋىق ناسىباي تاركىلەندى.

ەلوردانىڭ ساۋدا نۇكتەلەرى بويىنشا رەيدتەر كۇن سايىن وتەدى.

ەسكە سالا كەتەيىك، جاقىندا پارلامەنت ۆەيپتەرگە تىيىم سالاتىن زاڭدى بەكىتكەنىن جازعان بولاتىنبىز. سونداي-اق، دەپۋتات جارقىنبەك امانتاي ۇلى ناسىباي سياقتى زياندى زاتتار ساتاتىن ساۋدا ورىندارىن باقىلاۋدى سۇراپ، مەكتەپ وقۋشىلارى ەش كەدەرگىسىز ناسىباي اتىپ جۇرگەنىنە الاڭداۋشىلىق بىلدىرگەن ەدى.

سوڭعى جاڭالىقتار