ەلوردادا مۇحتار اۋەزوۆكە ەسكەرتكىش قويىلدى

استانا. قازاقپارات – 28-قىركۇيەكتە ەلوردامىزدا ۇلى جازۋشى، دراماتۋرگ جانە عالىم مۇحتار اۋەزوۆكە ارنالعان ەسكەرتكىشتىڭ سالتاناتتى اشىلۋ ءراسىمى ءوتتى، دەپ حابارلايدى اقوردانىڭ باسپا ءسوز قىزمەتى.

ەسكەرتكىشتى قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين جانە جازۋشىنىڭ تۋىسى ديار قونايەۆ اشتى.

ەرلان قارين مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى. پرەزيدەنتتىڭ قۇتتىقتاۋ حاتىندا: «مۇحتار اۋەزوۆ - ۇلت رۋحانياتىندا ايرىقشا ورنى بار ۇلى جازۋشى. ول شىعارمالارىندا حالقىمىزدىڭ ءبىتىم-بولمىسى مەن تىنىس-تىرشىلىگىن شەبەر سۋرەتتەدى. قالامگەردىڭ تەڭدەسسىز تۋىندىلارىنان انا ءتىلىمىزدىڭ بايلىعى مەن ءتول وركەنيەتىمىزدىڭ تەرەڭدىگى ايقىن كورىنەدى. شىن مانىندە، جۇرتىمىزدىڭ جان دۇنيەسىن بىلگىسى كەلگەن ادام ەڭ الدىمەن اۋەزوۆتى وقۋى كەرەك»، - دەپ كورسەتىلگەن.

سونىمەن قاتار ءىس-شاراعا زيالى قاۋىم وكىلدەرى، جازۋشىلار، مادەنيەت سالاسىنىڭ قايراتكەرلەرى، قوعامدىق كەڭەس مۇشەلەرى، قالالىق ءماسليحات دەپۋتاتتارى جانە مۇحتار اۋەزوۆتىڭ تۋىستارى قاتىستى.

مۇسىنشىلەر ايدوس بۇركىتبايەۆ پەن تيمۋر ەرمۇحامەتوۆ جاساعان ساۋلەت ونەرىنىڭ تۋىندىسى استانا قالاسىنداعى قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىنىڭ الدىندا ورناتىلدى.