ەلوردادا ۇلتتىق ۇلان 700 گە جۋىق جاس ساربازبەن تولىقتى
استانا. KAZINFORM — استانادا ق ر ءى ءى م ۇلتتىق ۇلانىنىڭ 5573 اسكەري بولىمىندە جاس جاۋىنگەرلەر وتانعا ادال قىزمەت ەتۋگە سالتاناتتى تۇردە انت بەردى.

ق ر ۇلتتىق ۇلانىنىڭ باسپا ءسوز قىزمەتى اتاپ وتكەندەي، اسكەري انت — بۇل اسكەري قىزمەتشىنىڭ قارۋلى كۇشتەر قاتارىنا قوسىلۋ كەزىندە بەرەتىن سالتاناتتى انتى. بۇل جاي عانا ءراسىم ەمەس، وتانعا ادالدىق، ونىڭ ەگەمەندىگى مەن قاۋىپسىزدىگىن قورعاۋعا دايىن بولۋ تۋرالى سانالى ۋادە.
ەلىمىزدىڭ تۇكپىر-تۇكپىرىنەن كەلگەن تەپسە تەمىر ۇزەر جىگىتتەر ءبىر اي ارنايى دايىندىقتان وتكەن. ەندى ولار باس قالامىزدىڭ تىنىشتىعى مەن كوشە ءتارتىبىن قامتاماسىز ەتۋگە اتسالىسادى. ۇلتتىق ۇلان قاتارىندا بورىشىن وتەۋگە كەلگەن جاس جاۋىنگەرلەردى ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور قايرات ۇمبەتوۆ قۇتتىقتاپ، قادامدارىنا ساتتىلىك تىلەدى. ال قۇراما كومانديرى گەنەرال- مايور ايان ەسجانوۆ جاڭادان كەلگەن ساربازداردىڭ قىزمەتتەرىنە باعىت-باعدار بەردى.
— بۇگىن سىزدەر اسكەري انت قابىلداي وتىرىپ، وتان الدىندا، اتا-انالارىڭنىڭ الدىندا اسكەري قىزمەتتەرىڭدى ادال اتقارۋعا ءسوز بەردىڭدەر. وسى ەرەكشە وقيعامەن سىزدەردى قۇتتىقتايمىن! ەندى سىزدەر اسكەري بولىمگە جۇكتەلگەن جاۋىنگەرلىك تاپسىرمالاردى ورىنداۋعا كىرىسەسىزدەر. ۇلتتىق ۇلان ساپىندا قىزمەت ەتۋ كەي جاعدايدا قيىن بولۋى مۇمكىن، الايدا كومانديرلەرىڭىزدىڭ ۇيرەتۋىمەن جانە جىل بويى جۇرگىزىلەتىن وقۋ مەن تاجىريبەلەردى مەڭگەرۋ ارقىلى مۇنى ەڭسەرۋگە بولادى، — دەدى گەنەرال-مايور قايرات ۇمبەتوۆ.

ءىس-شارا بارىسىندا الىس-جاقىننان كەلگەن اتا-انا، تۋعان-تۋىستارىنا ساربازدار وزدەرىنىڭ وقۋ پۋنكتىندە ءبىر اي بويى ۇيرەنگەن داعدىلارىن كورسەتتى. قوناقتار نازارىنا قۇرمەت قاراۋىل روتاسىنىڭ ساربازدارى كارابينمەن دەفيلە ۇسىنسا، ەندى ءبىر توپ قويان-قولتىق ۇرىس شەبەرلىكتەرىن پاش ەتى.
انت قابىلداماس بۇرىن ەلىمىزدىڭ جاۋىنگەرلەرى ارنايى وقۋ پۋنكتىندە اسكەري ومىرگە بەيىمدەلىپ، ىشكى تارتىپپەن تانىستى. سونداي-اق مەملەكەتتىك-قۇقىقتىق، ساپتىق دايىندىق، جالپى اسكەري جارعى، كۇن ءتارتىبىن جاتتاپ، بىلىمدەرىن جەتىلدىردى. سونىمەن قاتار جاۋىنگەرلىك قىزمەتكە ءتۇسۋ داعدىلارىن، اتۋ تاسىلدەرىن، اسكەري تەحنيكالار مەن قارۋ تۇرلەرىن مەڭگەردى. پاۆلودار قالاسىنان اسكەر قاتارىنا شاقىرىلعان ساعيدوللا باتىرحان اسكەري بورىشىن ەلوردالىق بريگادا قاتارىندا وتەيتىندىگىن ماقتان تۇتاتىنىن ايتتى.
— اسكەرگە ءوز قالاۋىممەن كەلدىم. ءاربىر ەر جىگىت ءوز وتانىن قورعاي الاتىنداي ازامات بولۋ كەرەك. اسكەردەگى تەمىردەي تارتىپكە باعىنا وتىرىپ، ومىردە يگىلىگىن بەرەر كوپتەگەن داعدىلاردى ۇيرەنەمىز. باستىسى ەلىمىزدىڭ ءوسىپ-وركەندەۋىنە ءوز ۇلەسىمىزدى قوسا الاتىندىعىمىز، — دەيدى ول.
ءار اتا-انا ءۇشىن بالاسى قاشاندا قىمبات. وسىنداي ماڭىزدى كۇنى بالالارىن ساعىنىپ، قولداۋعا جان-جاقتان مىڭداعان اتا-انا، تۋعان-تۋىس كەلدى.
ال باتىس قازاقستان وبلىسىنان شاقىرىلعان قاتارداعى سۇلتان ەسكەندىروۆتىڭ اكەسى المابەك قازيحانوۆ اسكەري قىزمەت وتكەرۋ كەزەڭىندە ۇلىنا قولداۋ كورسەتكەنى، تاربيەلەگەنى جانە وعان كوڭىل بولگەنى ءۇشىن اسكەري ءبولىم قولباسشىلىعىنا العىسىن ءبىلدىرىپ، ءاربىر اسكەري قىزمەتشىگە كورسەتىلەتىن ءتارتىپ پەن قامقورلىقتىڭ جوعارى دەڭگەيىن اتاپ ءوتتى.
شارا شىمىلدىعى ادەتتەگىدەي سالتاناتتى شەرۋىمەن جابىلدى. ساپتا تۇرعان جاس ساربازدار ەندى اعا بۋىنمەن بىرگە قوعامدىق ءتارتىپ پەن قاۋىپسىزدىكتى قامتاماسىز ەتەدى.
ەسكە سالساق، وسىعان دەيىن ۇلتتىق ۇلان ساربازدارى كىسى ولتىرگەن ادامدى ءىزىن سۋىتپاي ۇستاعانىن جازدىق.