ەلوردادا LRT قۇرىلىسى بەلگىلەنگەن مەرزىمىندە اياقتالا ما
استانا قالاسىنىڭ اكىمى جەڭىس قاسىمبەك ەلوردا كوشەلەرىندەگى كولىك كەپتەلىسىن ازايتۋ ءۇشىن قانداي شارالار قولعا الىنعانىن ءمالىم ەتتى، دەپ حابارلايدى Kazinform.
«LRT جۇمىستارى بيىل باستالدى، ەندى ءبىزدىڭ جوسپارىمىز بويىنشا 2,5 جىل ىشىندە قۇرىلىس اياقتالادى. بۇل كولىك كەپتەلىسى ماسەلەسىن شەشۋگە ۇلكەن ۇلەس قوسادى دەپ ەسەپتەيمىز. بيىل ءال فارابي - تاۋەلسىزدىك داڭعىلدارىنىڭ قيىلىسىندا جاڭا كوپىر سالدىق. ول تۇركىستان، اقمەشىت كوشەلەرى مەن ماڭگىلىك ەل داڭعىلىنداعى كولىك كەپتەلىسىن 15-20 پايىزعا ازايتتى» - دەپ جاۋاپ بەردى اكىم بۇگىن ورتالىق كوممۋنيكاتسيالار قىزمەتىندە ءتىلشى سۇراعىنا.
كەلەسى ۇلكەن كوپىر - رەديسسون قوناق ءۇيى مەن م. نارىكبايەۆ ۋنيۆەرسيتەتىنىڭ اراسىندا سالىنادى. ونىڭ قۇرىلىسى كۇزدە باستالىپ، ەكى جىلدا اياقتالادى. ول قورعالجىن تاسجولى مەن تۇران داڭعىلىنداعى كەپتەلىستى ازايتادى.
«سونداي-اق كەلەسى جىلى قابانباي باتىر داڭعىلىنا شىعاتىن تاۋەلسىزدىك داڭعىلىنىڭ جالعاسى سالىنا باستايدى. ش. ايتماتوۆ كوشەسىنىڭ اشىلۋى سىعاناق كوشەسى مەن ۇلى دالا داڭعىلى اراسىنداعى تۇران داڭعىلىنداعى كولىك جۇكتەمەسىن ايتارلىقتاي تومەندەتتى، بۇل كولىك جۇكتەمەسىنىڭ %12 تومەندەۋىنە اكەلدى. سونىمەن قاتار شاعىن اينالما جولدىڭ قۇرىلىسى ءجۇرىپ جاتىر»، - دەدى جەڭىس قاسىمبەك.
