ەلوردادا كورەيالىق ونەرپازداردىڭ مادەني ءىس- شارالارى وتەدى

استانا. KAZINFORM - وسى جاز بەن كۇزدە استانالىقتار مەن ەلوردا قوناقتارى كارىس حالقىنىڭ مادەني ءىس-شارالارىن تاماشالاي الادى.

بۇل تۋرالى قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى چجو تە-يك ءمالىم ەتتى.

«2022-2023 -جىلدار كورەيا رەسپۋبليكاسى مەن قازاقستان رەسپۋبليكاسى اراسىنداعى ءوزارا مادەني الماسۋ جىلى بولدى. ەكى جىلدىڭ ىشىندە ەكىجاقتى مادەني قارىم- قاتىناس تەرەڭدەي ءتۇستى. اتاپ وتەر بولساق، وپەرالىق كونسەرتتەر، كورەي ءداستۇرلى مۋزىكاسى مەن تحەكۆوندو بويىنشا قويىلىمدار، سونداي-اق ەكى ەلدىڭ مادەني جاقىنداسۋىنا ىقپال ەتكەن ءسان كورسەتىلىمدەرى وتكىزىلدى»، - دەدى چجو تە- يك ەلوردادا «ونەر رەتىندە جاندانعان حانبوك» اتتى كورمەنىڭ اشىلۋ سالتاناتىندا.

سونداي- اق، ەلشى مىرزا ەكى ەل اراسىنداعى مادەني قارىم- قاتىناس تەندەنتسياسىن جالعاستىرۋ ءۇشىن ەلشىلىك پەن كورەي مادەني ورتالىعى بيىل ءبىرقاتار ءىس- شارا وتكىزەتىنىن ايتتى.

«ماۋسىم ايىندا «K-pop Cover Dance Champion» بي فەستيۆالى وتەدى، ال شىلدەدە «Astana Comic Con» فەستيۆالىنە كورەي كوميكستەرى قاتىسادى. تامىز ايىندا «استانا وپەرا» تەاترىندا كورەيا رەسپۋبليكاسىنىڭ ۇلتتىق زاماناۋي بي كومپانياسى، ال قازان ايىندا ءداستۇرلى كورەي بي توبى ونەر كورسەتەدى. ەلشىلىك پەن كورەي مادەني ورتالىعى كوپشىلىككە ارنالعان جانە مادەني ءىس-شارالاردى ۇسىنا وتىرىپ، بارشاڭىزدى اسىعا كۇتەدى»، - دەيدى ول.