ەلوردادا ج ر ۆ ي جانە مەتاپنيەۆموۆيرۋس بويىنشا ەپيدەميولوگيالىق جاعداي قالاي

استانا. KAZINFORM - استانا قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆا ەلورداداعى ج ر ۆ ي جانە مەتاپنيەۆموۆيرۋس بويىنشا ەپيدەميولوگيالىق جاعدايعا قاتىستى تۇسىنىك بەردى.

- 2024 -جىلدىڭ 26-جەلتوقساننان باستاپ 2025 -جىلى 1-قاڭتارعا دەيىن ەلوردادا ءجىتى رەسپيراتورلىق ۆيرۋستى ينفەكسيالاردىڭ 4863 جاعدايى تىركەلدى، ياعني 100 مىڭ تۇرعىنعا شاققانداعى سىرقاتتانۋ كورسەتكىشى 333.5 دەڭگەيىندە بولدى. بىلتىرعى سايكەس كەزەڭمەن سالىستىرعاندا اۋرۋ جۇقتىرۋ 10 پايىزعا جوعارى، - دەدى ج. پراليەۆا.

تۇماۋعا جاتپايتىن ۆيرۋستاردىڭ ىشىندە رينوۆيرۋس 13 پايىز كورسەتكىشپەن باسىم دەڭگەيدە بولدى، ال ءبىرشاما از كورسەتكىشتە رينوسينتيتسيالدى ۆيرۋس (%8)، بوكاۆيرۋس (%2)، ادام كوروناۆيرۋسى (%3)، ادەنوۆيرۋس (%2)، پاراگريپپ (%1)، مەتاپنيەۆموۆيرۋس (%1) انىقتالدى. سونىمەن قاتار، ءبىر ناۋقاستا ەكى نەمەسە ءۇش ۆيرۋسى بارلار دا از ەمەس.

- مەتاپنيەۆموۆيرۋس - بۇل كوپتەگەن ەلدەردە، سونىڭ ىشىندە قازاقستاندا دا تارالاتىن ۆيرۋستاردىڭ ءبىرى. ينفەكسيالاردىڭ باسقا تۇرلەرىمەن قاتار، ياعني جرۆي جانە تۇماۋ اۋرۋىنىڭ ماۋسىمدىق ءوسۋى كەزىندە اينالىمدا بولادى، - دەدى دەپارتامەنت وكىلى.

وسى ورايدا استانا قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى حالىقتى الدىن الۋ شارالارىن ساقتاۋعا جانە ادامدار كوپ جينالاتىن جەرلەرگە بارۋدان تارتىنۋعا شاقىردى. اسىرەسە، بۇل جاعداي سوزىلمالى اۋرۋلارى بار حالىقتىڭ نەعۇرلىم وسال توپتارىنا قاتىستى. سوندىقتان ءۇي-جايلاردى ۇنەمى جەلدەتىپ وتىرۋ، ناۋقاس ادامدارمەن بايلانىستى شەكتەۋ، ولاردى وقشاۋلاۋدى قامتاماسىز ەتۋ، تۇماۋ جانە جرۆي بەلگىلەرى پايدا بولعان كەزدە بالالاردى ۇيدە قالدىرۋ كەرەك. ەگەر اۋرۋدىڭ بەلگىلەرى پايدا بولسا، ۋاقتىلى مەديتسينالىق كومەككە جۇگىنگەن ءجون.

وسىعان دەيىن حابارلاعانىمزداي، مەملەكەت باسشىسى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەر ۇيىنە بارعاندا مەتاپنيەۆموۆيرۋسپەن بايلانىستى جاعدايعا پىكىر بىلدىرگەن ەدى.

اۆتور

رۋسلان عابباسوۆ