ەلوردادا ش ى ۇ سامميتى باستالدى

استانا. KAZINFORM - ەلورداداعى تاۋەلسىزدىك سارايىندا قازاقستان توراعالىعىمەن شاڭحاي ىنتىماقتاستىق ۇيىمىنىڭ سامميتى باستالدى.

ءىس-شاراعا قازاقستان، يران، قىتاي، قىرعىزستان، پاكىستان، رەسەي، تاجىكستان، وزبەكستان، بەلارۋس، موڭعوليا، ازەربايجان، قاتار، تۇركيا جانە تۇرىكمەنستاننىڭ مەملەكەت پەن ۇكىمەت باسشىلارى، ب ا ءا-دەن راس ءال-حايما امىرلىگىنىڭ ءامىرى، ءۇندىستاننىڭ سىرتقى ىستەر ءمينيسترى، سونداي-اق ش ى ۇ باس حاتشىسى جانە ش ى ۇ وڭىرلىك تەرروريزمگە قارسى قۇرىلىمىنىڭ اتقارۋشى ديرەكتورى قاتىسۋدا.

سامميتكە سونىمەن قاتار بۇۇ باس حاتشىسى جانە ت م د، ە ى ۇ، ا ءو س ش ك، ۇ ق ش ۇ، ە ە ك جانە ا ق ي ۇ سياقتى حالىقارالىق ۇيىمداردىڭ باسشىلارى شاقىرىلعان.

ش ى ۇ ءسامميتى العاش رەت «ش ى ۇ-عا مۇشە مەملەكەت باسشىلارى كەڭەسىنىڭ وتىرىسى» جانە «ش ى ۇ+» كەزدەسۋى فورماتىندا وتۋدە.

ش ى ۇ- عا مۇشە مەملەكەت باسشىلارى كەڭەسىنىڭ وتىرىسى بارىسىندا استانا دەكلاراتسياسى، 20 شەشىم، مەملەكەت باسشىلارىنىڭ 3 مالىمدەمەسى، ونىڭ ىشىندە «ءادىل بەيبىتشىلىك، كەلىسىم جانە دامۋ ءۇشىن الەمدىك بىرلىك تۋرالى»، «ش ى ۇ-نى جەتىلدىرۋ تۋرالى» باستاماسى قابىلدانباق. بەلارۋس رەسپۋبليكاسىن ش ى ۇ مۇشەلىگىنە قابىلداۋ ءراسىمىن اياقتاۋ جانە وعان ۇيىمعا مۇشە مەملەكەت مارتەبەسىن بەرۋ تۋرالى تاريحي شەشىم دە بۇگىن جۇزەگە اسپاق.

جالپى، مەملەكەت باسشىلارى ۇيىمنىڭ كوپجوسپارلى ىنتىماقتاستىعىن، ونىڭ پەرسپەكتيۆالارىن ودان ءارى نىعايتۋعا جانە وزەكتى حالىقارالىق جانە وڭىرلىك پروبلەمالاردى شەشۋگە ىقپال ەتەتىن كوپتەگەن ماسەلەنى قاراستىرادى.

«ش ى ۇ+» كەزدەسۋى «ءادىل بەيبىتشىلىك، كەلىسىم جانە دامۋ ءۇشىن الەمدىك بىرلىك تۋرالى» تاقىرىبىندا كەڭەيتىلگەن فورماتتا وتەدى.

اۆتور

مارلان جيەمباي