ەلوردادا ءيىن تىرەسكەن قۇرىلىسقا شەكتەۋ قويۋ باسپانا نارىعىنا قالاي اسەر ەتەدى
استانادا نۇكتەلىك قۇرىلىسقا تىيىم سالۋ تۇرعىن ءۇي نارىعىنا قالاي اسەر ەتەۋى ىقتيمال؟
بۇعان قاتىستى قازاقستان بىرىككەن ريەلتورلار قاۋىمداستىعى پرەزيدەنتىنىڭ كەڭەسشىسى نينا لۋكيانەنكو پىكىر ءبىلدىردى، دەپ حابارلايدى Kazinform.
«مەنىڭ ويىمشا، بۇل شەكتەۋ تۇرعىن ءۇي نارىعىنداعى جاعدايعا ەشقانداي اسەر ەتپەيدى. جالپى، ەلىمىزدە تۇرعىن ءۇي قۇرىلىسى سەكتورىنا جان- جاقتى نازار اۋدارۋ قاجەت. ەلوردادا ونداعان نىسان قولدانىستاعى زاڭناماعا سايكەس سالىنىپ جاتقان جوق. بۇل جىلجىمايتىن مۇلىكتى ساتىپ الۋشىلار ءۇشىن عانا ەمەس، جالپى ەل ءۇشىن الاڭداتارلىق جاعداي»، - دەدى نينا لۋكيانەنكو Kazinform ءتىلشىسىنىڭ ساۋالىنا جاۋاپ بەرە وتىرىپ.
ول سونداي- اق قازىر تۇرعىن ءۇي قۇنىنا قانداي فاكتورلار اسەر ەتىپ وتىرعانىنا توقتالدى.
«وسىمگە ءتۇرلى قولجەتىمدى قارجىلاندىرۋ باعدارلامالارى ىقپال ەتەدى. اتاپ ايتقاندا، حالىقتىڭ بارلىق ساناتى ءۇشىن تومەن پايىزبەن نەسيە بەرۋ. مەن ءارقاشان مۇنداي تەتىكتەرگە قارسىمىن»، - دەدى نينا لۋكيانەنكو.
ساراپشى مىسال رەتىندە كورشى رەسەيدەگى جاعدايدى ەسكە سالدى.
«رەسەيدىڭ ءىرى قالالارداعى جىلجىمايتىن مۇلىك باعاسىن قاراڭىز. وندا جاڭا تۇرعىن ءۇي قۇرىلىسىن قولداۋ ءۇشىن مىناداي شارتتار ۇسىنىلدى: %10 باستاپقى جارنا جانە 2 پايىزبەن يپوتەكا. بارلىعى ەكى ايدان كەيىن باسپانا ساتىپ الىپ، ونى قايتا وتكىزەتىن ينۆەستورعا اينالدى. ونىڭ ۇستىنە قازىر بۇل ەلدىڭ ينۆەستيتسيالىق تارتىمدىلىق دەڭگەيى اسا جوعارى ەمەس. سوندىقتان ءبىزدىڭ ەلىمىزدە قۇرىلىس سالۋشىلار اراسىندا ءۇيدى ساۋدالاۋعا قاتىستى ءتارتىپ ورناتۋ كەرەك. قازىر كىم قالاي ساتقىسى كەلەدى، سولاي ساتا بەرەدى. ول ءۇشىن زاڭدى اينالىپ وتەتىن شارتتار ويلاپ تاپتى، ال حالىق ونىمەن كەلىسۋگە ءماجبۇر»، - دەيدى نينا لۋكيانەنكو.
