ەلوردادا ءۇي كەزەگىندە تۇرعاندار مەن جۇمىس ىستەيتىن جاستارعا 2 مىڭعا جۋىق پاتەر بەرىلەدى
استانا. KAZINFORM - جىل سوڭىنا دەيىن استانادا باسپانا كەزەگىندە تۇرعان ازاماتتار مەن جۇمىس ىستەيتىن جاستارعا 1856 پاتەر بەرىلەدى.
پايدالانۋعا بەرىلەتىن كوپپاتەرلى ەكى تۇرعىن ءۇيدىڭ جالپى اۋدانى 44,4 مىڭ شارشى مەتردى قۇرايدى، ال پاتەر سانى - 806.
استانا قالاسىنىڭ قۇرىلىس باسقارماسىنىڭ مالىمەتىنشە، جوبا اياسىندا كەلەسى جۇمىستار اياقتالادى:
- E16, E32, E45, E24 كوشەلەرى قيىلىسىندا ورنالاسقان (جوبالىق اتاۋى) كىرىكتىرىلگەن ءۇي- جاي مەن اۆتوتۇراعى بار كوپپاتەرلى تۇرعىن ءۇي كەشەنى. قۇرىلىستىڭ ەكىنشى كەزەڭىندە 658 پاتەر قاراستىرىلعان؛
- E20, E32 جانە E33 كوشەلەرى قيىلىسىندا ورنالاسقان (جوبالىق اتاۋى) اۆتوتۇراعى بار كوپپاتەرلى تۇرعىن ءۇي كەشەنى، وندا 148 پاتەر كىرەدى.
سونىمەن قاتار جۇمىس ىستەيتىن جاستارعا 1050 پاتەر بەرىلمەك.
وتكەن جىلى استانا قالاسىنىڭ قۇرىلىس باسقارماسى جۇمىس ىستەيتىن جاستارعا 1050 دايىن پاتەر ساتىپ الۋ بويىنشا كەلىسىمشارتتار جاساستى.
استانا اكىمدىگىنىڭ Kazinform اگەنتتىگىنىڭ سۇراۋىنا بەرگەن جاۋابىنا سايكەس، پاتەرلەردى تاپسىرۋ جەتكىزۋشىلەردەن قابىلداپ العاننان كەيىن باستالادى، ياعني شامامەن 2025 -جىلدىڭ مامىر- قازان ايلارى ارالىعىندا.
اتالعان جىلجىمايتىن مۇلىك استانا قالاسىنىڭ تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ قاراۋىنا وتەدى، ال باسقارما پاتەرلەردى ۇمىتكەرلەر اراسىندا ءبولۋ جۇمىستارىمەن اينالىسادى.
رەسمي مالىمەتتەرگە سايكەس، بۇگىندە استانا قالاسىنىڭ كوممۋنالدىق تۇرعىن ءۇي قورىنىڭ ەسەبىندە 38 مىڭنان استام ازامات باسپانا كەزەگىندە تۇر.
ايتا كەتسەك، ناۋرىزدا وتكەن ۇكىمەت وتىرىسىندا ۆيتسە-پرەمەر سەرىك جۇمانعارين بيىل ەلىمىزدە رەكوردتىق كولەمدە تۇرعىن ءۇي پايدالانۋعا بەرىلەتىنىن مالىمدەگەن ەدى.
سونداي-اق ەلوردادا تۇرعىنداردى پاتەرگە تىركەۋگە قويۋدىڭ جاڭا ءتارتىبى تۋرالى جازعان بولاتىنبىز.
