ەلوردادا ءبىر كۇندە 4 بالا تەرەزەدەن قۇلاپ، ەكەۋى مەرت بولدى

استانا. KAZINFORM - استانا قالاسىندا ءبىر كۇننىڭ ىشىندە 4 بالا تەرەزەدەن قۇلادى. بۇل اقپاراتتى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى راستادى.

قوعامدىق دەنساۋلىق ساقتاۋ باسقارماسىنىڭ بىزگە بەرگەن مالىمەتىنشە، ەكى بالا جەدەل جاردەم جەتكەنشە قازا بولعان. قازىر امان قالعان ەكى بالا اۋرۋحانانىڭ رەانيماتسيا بولىمىندە ەم الىپ جاتىر، جاعدايى - اۋىر.

وسى ورايدا استانا قالاسىنىڭ پوليتسياسى بالالاردىڭ قاۋىپسىزدىگىنە ەرەكشە نازار اۋدارۋعا شاقىرادى.

- جىل باسىنان بەرى 45 بالالاردىڭ تەرەزەدەن قۇلاۋ وقيعاسى تىركەلدى، ونىڭ 12 ءسى قايعىلى اياقتالدى. مۇنداي وقيعالار كوبىنە بالالار قاراۋسىز قالعان كەزدە جانە ۇيدەگى قاراپايىم ساقتىق شارالارى ساقتالماۋ سالدارىنان بولىپ جاتادى، - دەپ ەسكەرتەدى قالالىق پوليتسيا.

ەسكە سالساق، توتەنشە جاعدايلار مينيسترلىگى بالالاردىڭ تەرەزەدەن قۇلاۋ وقيعالارىنا الاڭداۋشىلىق ءبىلدىردى.