ەلوردادا 8-ناۋرىز مەرەكەسىنە وراي قانداي ءىس-شارالار وتەدى

استانا. KAZINFORM - استانادا 8-ناۋرىز مەرەكەسىنە وراي ءبىرقاتار مادەني ءىس- شارا وتكىزۋ جوسپارلانىپ وتىر. بۇل تۋرالى استانا اكىمدىگىنىڭ رەسمي سايتى حابارلادى.

6-ناۋرىز كۇنى ساعات 11:00 دە زاعيپ جانە ناشار كورەتىن ازاماتتارعا ارنالعان مامانداندىرىلعان كىتاپحانادا «انامنىڭ ايالى الاقانى» ادەبي كەشىن ۇيىمداستىرادى.

بۇل كۇنى اۋدان اكىمدىكتەرىندە كوپبالالى انالار اراسىندا «التىن القا» جانە «كۇمىس القا» توسبەلگىلەرىن تابىستاۋ سالتاناتى وتەدى.

سونداي-اق قازاق ۇلتتىق حورەوگرافيا اكادەمياسىندا مەرەكەلىك كونتسەرت ۇيىمداستىرۋ جوسپارلانىپ وتىر.

6-ناۋرىز كۇنى ساعات 19:00 دە م. گوركي اتىنداعى مەملەكەتتىك اكادەميالىق ورىس دراما تەاترى جانە ۇلتتىق ۇلان بىرلەسىپ كورەرمەن نازارىنا «ءاليا» قويىلىمىن ۇسىنادى.

ءدال وسى كۇنى ساعات 19:00 دە «جاستار» سارايىندا «ايەلدەرگە تاعزىم» اتتى حالىقارالىق ايەلدەر كۇنىنە وراي مەرەكەلىك كونسەرت وتەدى.

7-8-ناۋرىز ارالىعىندا سارايشىق اۋدانىندا كوممۋنالدىق قىزمەت ماماندارىنا قىزعالداق تاراتۋ ءىس-شاراسى وتەدى.

6-8-ناۋرىز كۇندەرى بايقوڭىر اۋدانىنىڭ اكىمى تىل ەڭبەككەرلەرىن ارنايى ۇيىنە بارىپ، حالىقارالىق ايەلدەر كۇنىمەن قۇتتىقتايدى.

7-ناۋرىز كۇنى قالا كوشەلەرىندە ەلوردانىڭ نازىك جاندىلارىنا قىزعالداق تاراتۋ ءىس-شاراسى ۇيىمداستىرىلادى.

«الجير» مەموريالدى- مۇراجاي كەشەنىندە 7-8-ناۋرىز كۇندەرى ساعات 10:00-18:00 ارالىعىندا «انا - ءومىردىڭ گۇلى» كورمەسى وتەدى.

ءا. مامبەتوۆ اتىنداعى مەملەكەتتىك دراما جانە كومەديا تەاترى 8-ناۋرىز كۇنى ساعات 19:00 دە «كەلىندەر كوتەرىلىسى» جانە 9-ناۋرىز ساعات 19:00 دە «كۇشىك كۇيەۋ» كومەديالارىن ۇسىنادى.

ال قۋىرشاق تەاترى 7-ناۋرىز ساعات 12:00 دە جانە 16:00 دە، 8-9-ناۋرىز ساعات 12:00 دە جانە 16:30 دا «ماۋگلي» ەرتەگىسىنىڭ قويىلىمىن ۇسىنادى.

سول سياقتى مۋزىكالىق جاس كورەرمەن تەاترى 8-ناۋرىزدا ساعات 18.00 دە «تەاتر الەمى» مەرەكەلىك قويىلىمىن ۇسىنادى. سونىمەن قاتار، م. گوركي اتىنداعى مەملەكەتتىك اكادەميالىق ورىس دراما تەاترى مەرەكە كۇنى 18:00 گە «براك پو- يتاليانسكي» قويىلىمىن ازىرلەپ وتىر.

8-ناۋرىزدا «قازاقستان» ورتالىق كونسەرت زالىندا مەرەكەلىك كونسەرت، «جاستار» تەاترىندا «جانارىمداعى جالعىز اۋەن» تەاترلاندىرىلعان كونسەرتتىك باعدارلاما وتەدى.

9-ناۋرىز كۇنى ساعات 17:00 دە ە. راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق زالىندا قازاق وركەسترىنىڭ ءارتىسى، سىمقوبىزشى، مادەنيەت سالاسىنىڭ ۇزدىگى بوتاگوز ءتاشىموۆانىڭ «اسىل قازىنا» اتتى جەكە كونسەرتى وتەدى.