ەلوردادا 200 گە جۋىق مەكتەپ وقۋشىسى جۇمىسشى ماماندىعى بويىنشا ديپلوم الادى
استانا. KAZINFORM - استانادا بيىل 200 گە جۋىق مەكتەپ وقۋشىسى جۇمىسشى ماماندىعى بويىنشا ديپلوم الادى، دەپ جازادى قالا اكىمدىگىنىڭ رەسمي سايتى.

2023 -جىلى تەحنيكالىق جانە كاسىپتىك ءبىلىم بەرۋدە كوللەدجدەر بازاسىندا جوعارى سىنىپ وقۋشىلارىنىڭ كاسىبي بىلىكتىلىگىن ارتتىرۋ ماقساتىندا پيلوتتىق جوبا ىسكە قوسىلعان. وندا تاڭەرتەڭ مەكتەپتە ساباق وقيتىن وقۋشى تۇستەن كەيىن قايتا كاسىبي ءبىلىم بەرەتىن ارنايى وقۋ ورنىنا بارىپ ءبىلىم الادى.
باعدارلامانىڭ ەرەكشەلىگى جوعارعى سىنىپ وقۋشىسى مەكتەپتە ءبىلىم الۋمەن قاتار ءبىر ماماندىقتى يگەرىپ، وقۋدى بىتىرگەننەن كەيىن اتتەستاتپەن قوسا ديپلوم الادى.

وقۋ جۇكتەمەسىنىڭ مولشەرى كۇنىنە ءتورت ساعاتتان اسپايدى. ءبىلىم الۋ ءۇشىن وقۋ ۋاقىتىنىڭ كولەمى كەمىندە 48 كرەديتتى قۇراۋى ءتيىس. وقۋ مەرزىمى - 1 جىل 5 اي.
پيلوتتىق جوبا اياسىندا ەلوردادا ءۇش مەملەكەتتىك كوللەدج تاڭداپ الىندى. بۇگىندە 156 وقۋشى «اۆتوكولىك قۇرالدارىنا تەحنيكالىق قىزمەت كورسەتىپ جوندەۋ جانە پايدالانۋ»، «تىگىن ءوندىرىسى جانە كيىم ديزاينى»، «اسپازشى» ماماندىقتارىن وقىپ، پراكتيكالىق تاجىريبەدەن ءوتىپ جاتىر.
بيىل مامىر ايىندا جوبانىڭ العاشقى ءبىلىم الۋشىلارىنا كوللەدج ديپلومى تابىستالادى. استانا قالاسىنىڭ ءبىلىم باسقارماسى، كوللەدج جانە مەكتەپ اكىمشىلىگى، اتا- انالار ءار اي سايىن بالالاردىڭ وقۋ ۇلگەرىمىنە باقىلاۋ جاساۋ ماقساتىندا مونيتورينگ جۇرگىزەدى.

ايتا كەتەيىك، جۇمىسشى ماماندىقتار جىلىنا وراي پيلوتتىق جوبانىڭ اۋقىمى كەڭەيتىلەدى. بيىل قالا كوللەدجدەرى 300 دەن استام وقۋشى قابىلداپ، تىگىنشى، ناۋبايشى، اسپاز، شاشتاراز، فلوريست، ءموبيلدى ءوندىرىس مامانى، ەلەكتر گاز سالۋشى ماماندىقتارى وقىتىلادى دەپ جوسپارلانىپ وتىر.
