ەلوردا پروكۋراتۋراسى ءوندىرىستى جولعا قويماق بولعان ينۆەستورلارعا كەدەرگى كەلتىرۋ جاعدايلارىن انىقتادى

استانا. KAZINFORM - ينۆەستورلاردىڭ قۇقىقتارىن قورعاۋ ەلوردالىق پروكۋراتۋرانىڭ ەرەكشە باقىلاۋىندا، دەپ حابارلايدى استانا قالالىق پروكۋراتۋراسىنىڭ باسپا ءسوز قىزمەتى.

Прокуратура
فوتو: Kazinform

پروكۋرورلار ينۆەستيتسياسى 1 تريلليون تەڭگە بولاتىن 39 پروبلەمالىق كەيستى شەشتى، ولاردىڭ كوپشىلىگى ءبىلىم بەرۋ (20 جوبا)، وندىرىستىك ءۇي- جايلار مەن زاۋىتتار (23 جوبا)، سپورت (9 جوبا) جانە مەديتسينا (7 جوبا) ماسەلەلەرى بويىنشا.

ناتيجەسىندە 75 ينۆەستور، ونىڭ ىشىندە 11 شەتەلدىك ينۆەستوردىڭ (كاتار، تۇركيا، رەسەي، ۋكراينا، سينگاپۋر، ب ا ءا) قۇقىعى قورعالدى.

مىسالى، پروكۋراتۋرانىڭ نارازىلىعى بويىنشا جەر ۋچاسكەسىنەن زاڭسىز اۋىرتپالىق الىنىپ تاستالدى، بۇل ينۆەستورعا جەم- ءشوپ وندىرەتىن زاۋىت سالۋدى باستاۋعا مۇمكىندىك بەردى.

باسقا جاعدايدا، پروكۋراتۋرانىڭ ارالاسۋىنان كەيىن ءتورت ينۆەستورعا جەر ۋچاسكەلەرى ءبولىندى، وعان دەيىن ولاردى بەرۋدەن فورمالدى نەگىزدەر بويىنشا بىرنەشە رەت باس تارتىلدى (جۇيەلەردەگى اقاۋلار).

ناتيجەسىندە ينۆەستورلار جارتىلاي فابريكاتتار وندىرەتىن تسەح، مۇناي ونىمدەرى قويماسى، وندىرىستىك-قويما كەشەنى، سونداي- اق گازوبلوك ءوندىرىسى بويىنشا جوبالاردى ىسكە قوسا الدى.

قاداعالاۋ ورگانىنىڭ تاعى ءبىر نەگىزگى مىندەتى ينۆەستورلار ءۇشىن جۇيەلىك پروبلەمالاردى جويۋ بولدى.

اتاپ ايتقاندا، 34 ينۆەستوردا جەر ۋچاسكەلەرىنىڭ نىسانالى ماقساتى پايدالانۋدى كوزدەمەدى. جوبالاردا تەك قۇرىلىس ماقساتى بولدى، بۇل سالىنعان نىسانداردى تىركەۋگە كەدەرگى بولدى.

پروكۋراتۋرانىڭ جەدەل جۇمىسىنىڭ ارقاسىندا ماسەلە رەتتەلدى، وبەكتىلەر ۋچاسكەلەردىڭ نىسانالى ماقساتىن وزگەرتپەي پايدالانۋعا بەرىلەدى.

پروكۋراتۋرا ورگاندارىنىڭ جاڭا قۇزىرەتتەرى شەڭبەرىندە «پروكۋرورلىق سۇزگى» ىسكە قوسىلدى.

ەندى ينۆەستورعا قاتىستى تەكسەرۋ، تىيىم سالۋ شارالارىن قولدانۋ، اكىمشىلىك ءىس جۇرگىزۋ نەمەسە تالاپ قويۋ تۋرالى ءاربىر شەشىم پروكۋروردىڭ كەلىسىمىن تالاپ ەتەدى.

بۇگىندە ەلوردادا پروكۋرورلار ينۆەستورلارعا قاتىستى زاڭسىز شىعارىلعان مەملەكەتتىك ورگانداردىڭ 79 شەشىمىن كەلىسۋدەن باس تارتتى (17 سالىقتىق تەكسەرۋدى تاعايىنداۋ، 19 اكىمشىلىك ءوندىرىستى قوزعاۋ، 5 جەر ۋچاسكەسى بويىنشا ينۆەستورلاردى اۋىستىرۋ، ءبىرجاقتى تارتىپپەن 26 شارتتى بۇزۋ، 12 شارتتى ۇزارتۋدان باس تارتۋ تۋرالى).

ينۆەستورلاردىڭ وتىنىشتەرىن جەدەل دەن قويۋ جانە قاراۋ ءۇشىن 87172712467 ءنومىرى بويىنشا ەلوردا پروكۋراتۋراسىنىڭ فرونت- وفيسى جۇمىس ىستەيدى.

وسىعان دەيىن ەلوردالىق پروكۋراتۋرا 4 ينۆەستوردىڭ قۇقىعىن قورعاعانى تۋرالى جازدىق.

سوڭعى جاڭالىقتار