ەلوردا بيىل حالىقارالىق ءىس-شارالار وتكىزۋدەن 2 ميلليون ەۋرو تابىس تاپپاق
استانا. KAZINFORM - وتكەن جىلى ەلىمىز ىسكەرلىك تۋريزمنەن 20,7 ميلليون دوللار كىرىس الدى. بۇل تۋرالى تۋريزم يندۋسترياسى كوميتەتى تۋريزم سالاسىنداعى جۇيەلى شارالاردى جۇزەگە اسىرۋ باسقارماسىنىڭ باسشىسى نۇربول بايجانوۆ ايتتى.
- كەيىنگى ءۇش جىلدا قازاقستان حالىقارالىق دەڭگەيدەگى 21 ءىس-شارانى قابىلدادى. ال 2025-جىلى 5 ءىرى حالىقارالىق ءىس-شارا وتكىزۋ جوسپارلانىپ وتىر. وتكەن جىلى ەلىمىزدە 5180 شەتەلدىك دەلەگاتتىڭ قاتىسۋىمەن 14 حالىقارالىق وقيعا بولدى. ورتاشا ەسەپپەن العاندا، ولاردىڭ ءارقايسىسى شامامەن 4000 ا ق ش دوللارىن جۇمسادى. وسى ءىس-شارالاردان تۇسكەن كىرىستەردىڭ جالپى سوماسى 20,7 ميلليون دوللاردان استى. بۇل قاراجاتقا ۇشۋ، تۇرۋ، تاماقتانۋ جانە باسقا دا شىعىندار كىرەدى، - دەدى ول ورتالىق كوممۋنيكاتسيالار قىزمەتىندەگى بريفينگىدە.
ونىڭ اتاپ وتۋىنشە، استانا ىسكەرلىك جانە وقيعالىق تۋريزمنىڭ نەگىزگى ورتالىقتارىنىڭ بىرىنە اينالىپ كەلەدى. الداعى ايلاردا ەلوردادا ءبىرقاتار اۋقىمدى حالىقارالىق ءىس-شارا وتكىزۋ جوسپارلانعان.
- ماسەلەن، 27-28-ماۋسىمدا ا ق ش، كانادا، رەسەي، ەۋروپا جانە ازيادان 500 جەتەكشى مامان قاتىساتىن 10-دۇنيەجۇزىلىك نەيروحيرۋرگيالىق قاۋىمداستىق كونگرەسى وتەدى. 21-25-شىلدە ارالىعىندا نازاربايەۆ ۋنيۆەرسيتەتى حالىقارالىق ساراپشىلار قوعامىنىڭ كونگرەسىن قابىلدايدى. وعان 1000 نان استام قاتىسۋشى كەلەدى. 2025-جىلعى 18-22-تامىز ارالىعىندا استانا IFLA دۇنيەجۇزىلىك كىتاپحانالىق جانە اقپاراتتىق كونگرەسىن وتكىزۋ الاڭىنا اينالادى. كىتاپحانا تانۋ سالاسىنداعى ەڭ ءىرى وقيعا قازاقستاندا الەمنىڭ 130 دان استام ەلىنەن 4000 عا جۋىق دەلەگاتتى جيناماق. اتالعان ءىس-شارانى وتكىزۋ استاناعا شامامەن 2 ميلليون ەۋرو تابىس اكەلەدى دەپ كۇتىلۋدە. جيىنتىق پايدا دەلەگاتتاردىڭ تۇرۋعا، كولىككە، تاماقتانۋعا جانە باسقا دا قىزمەتتەرگە جۇمساعان شىعىندارىنان قۇرالادى، - دەدى نۇربول بايجانوۆ.
ايتا كەتەيىك، كەيىنگى 5 جىلدا تۋريستەردىڭ سانى 7,5 ەسەگە ءوستى. بىلتىر ەلىمىزگە 15 ميلليوننان استام ادام ساياحاتتاپ كەلدى.
