استانادا 200 ساراپشى قىلمىستىق سوت تورەلىگى جۇيەسىن تالقىلاپ جاتىر
استانا. KAZINFORM - ەلوردا تورىندە 200 دەي ساراپشى ورتالىق ازيا وڭىرىندەگى قىلمىستىق سوت تورەلىگى جۇيەسىن دامىتۋ ماسەلەسىن تالقىلاۋدا. بۇل تۋرالى ە ق ى ۇ د ي ا ق ب دەموكراتيالاندىرۋ دەپارتامەنتىنىڭ باسشىسى كونستانتين ۆاردزەلاشۆيلي ايتتى.
«ورتالىق ازيا ءۇشىن قىلمىستىق سوت تورەلىگى بويىنشا ساراپشىلاردىڭ 9- فورۋمىنا» ورتالىق ازيا ەلدەرىنەن 200 دەي ساراپشى، ودان بولەك وزگە دە حالىقارالىق ساراپشىلار قاتىسۋدا. ءبىز قىلمىستىق سوت تورەلىگى سالاسىنداعى رەفورمالاردى دامىتۋعا باعىتتالعان ءبىرقاتار سۇراقتاردى تالقىلاۋ ءۇشىن باس قوسىپ وتىرمىز. سونداي-اق، وسى رەفورمالاردى جۇزەگە اسىرۋ بارىسىندا كەزدەسەتىن كەدەرگىلەردى دە تالقىلايمىز. سوتقا دەيىنگى تەرگەۋدى، ادام قۇقىعىن قورعاۋداعى ستاندارتتار، زاڭ ۇستەمدىگىن قامتاماسىز ەتۋدى قامتيتىن قىلمىستىق سوت تورەلىگى سالاسىنداعى مەملەكەتتىك ساياسات تا نازاردان تىس قالمايدى. قاماۋداعى ادامداردى ازاپتاۋ، ازاپتاۋعا جول بەرمەۋ ءۇشىن وزىق ستاندارتتاردى قولداۋ تاقىرىبىنا دا توقتالامىز»، - دەدى فورۋم مودەراتورى ءارى ە ق ى ۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسى دەموكراتيالاندىرۋ دەپارتامەنتىنىڭ باسشىسى كونستانتين ۆاردزەلاشۆيلي.
ونىڭ ايتۋىنشا، بۇل فورۋمدى ق ر جوعارعى سوتى، ە ق ى ۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسى ۇيىمداستىرىپ جاتىر. سونداي-اق، ب ۇ ۇ-نىڭ ادام قۇقىقتارى جونىندەگى باس كوميسسارىنىڭ كەڭسەسى، ب ۇ ۇ ەسىرتكى جانە قىلمىس جونىندەگى باسقارماسى، ب ۇ ۇ دامۋ باعدارلاماسى، ە ق ى ۇ-نىڭ جەرگىلىكتى كەڭسەلەرى (استانا عانا ەمەس، و ا ەلدەرىندە ورنالاسقان دۋشانبە، اشحابات، بىشكەكتەگى كەڭسەلەر دە) بۇل شارانى وتكىزۋگە اتسالىسقان.
ايتا كەتەيىك، بۇعان دەيىن ورتالىق ازياداعى قىلمىستىق سوت تورەلىگى بويىنشا ساراپشىلاردىڭ 9-فورۋمى ءوتىپ جاتقانىن جازعان ەدىك. شارا ەكى كۇنگە سوزىلادى.
اۆتور
ەربول جانات
