ەلوردادا قۇقىق بۇزۋدىڭ 15 ءتۇرى اۆتوماتتى تۇردە انىقتالادى

- ەلوردادا 471 مىڭ كولىك قۇرالى تىركەلگەن. جىل سايىن ولاردىڭ سانى 25-30 مىڭعا ارتىپ كەلەدى. سونىمەن قاتار، جوعارى ماياتنيكتىك ميگراتسيا ساقتالىپ وتىر. كۇن سايىن قالاعا 150 مىڭعا جۋىق كولىك كىرىپ-شىعادى. كوشە-جول جەلىسىنە ارتىپ كەلە جاتقان جۇكتەمەنى ەسكەرە وتىرىپ، كولىك جۇيەسىن دامىتۋدىڭ كەشەندى باعدارلاماسى جۇزەگە اسىرىلىپ جاتىر. ءبىرىڭعاي وپەراتور بولىپ جول قوزعالىسىن باسقارۋ ورتالىعى ايقىندالدى. ول تۇراقتار كەڭىستىگىن، كولىك قوزعالىسىن، باعدارشامداردىڭ جۇمىسىن، كولىكتەردى ەۆاكۋاتسيالاۋدى جانە كولىكتىك جوسپارلاۋدى ۇيلەستىرەدى. كولىك قوزعالىسى اعىندارى ITS ينتەللەكتۋالدى كولىك جۇيەسى ارقىلى باسقارىلىپ، باعدارشامداردىڭ 80 پايىزى باسقارۋ جۇيەسىنە كوشىرىلدى، - دەدى قالا باسشىسى.

ونىڭ ايتۋىنشا، Presight كومپانياسىمەن بىرلەسىپ بەينەباقىلاۋ ينفراقۇرىلىمى جاڭارتىلدى. Smart City جوباسى اياسىندا بيىل جول قوزعالىسى ەرەجەلەرىن بۇزۋشىلىقتاردى تىركەيتىن 1200 دەن استام كەشەن جۇمىس ىستەپ تۇر. 60 مىڭنان استام بەينەكامەرا قالانىڭ سيتۋاتسيالىق ورتالىعىنا ينتەگراتسيالانعان. اۆتوماتتى تۇردە انىقتالاتىن قۇقىق بۇزۋشىلىقتار سانى 4 تەن 15 كە دەيىن ارتتى. سونداي-اق، جاساندى ينتەللەكت نەگىزىندە بەينە-اناليتيكانىڭ 35 ءتۇرى ەنگىزىلدى. قۇقىق بۇزۋشىلىقتىڭ جاڭا تۇرلەرىن ەسەپكە الۋ اعىمدىعى جىلعى ءساۋىر ايىندا باستالدى.

- كوشە-جول جەلىسىنىڭ وتكىزۋ قابىلەتىن ارتتىرۋ بويىنشا شارالار قابىلدانىپ جاتىر. باعدارشامداردىڭ جۇمىس رەجيمدەرى تۇزەتىلدى، كولىك قوزعالىسى قارقىندى ۋچاسكەلەردە سولعا بۇرىلۋعا شەكتەۋ قويىلىپ، بالامالى كەرى بۇرىلۋ ورىندارى ۇيىمداستىرىلدى. بۇل ءوز كەزەگىندە كوشەلەردىڭ وتكىزۋ قابىلەتىنە وڭ اسەرىن تيگىزدى. جول بەلگىلەرىن ورناتۋ جۇمىستارى جالعاسىپ جاتىر. جول جوندەۋ جۇمىستارىنىڭ جانە قولدانىلاتىن ماتەريالداردىڭ، ونىڭ ىشىندە اسفالتبەتون جابىنىنىڭ ساپاسىن قامتاماسىز ەتۋ تاسىلدەرى قايتا قارالدى. جاسىل جەلەكتەر مەن جارنامالىق كونسترۋكسيالاردى، كوشە جيھازدارىن جانە اباتتاندىرۋدىڭ باسقا دا ەلەمەنتتەرىن ورنالاستىرۋ كەزىندە، اسىرەسە مەكتەپتەر، بالاباقشالار مەن اۋرۋحانالاردىڭ ماڭىندا كورىنۋ ايماقتارىنىڭ شەكتەلۋىنە پايدا بولۋىنا جول بەرىلمەيدى، - دەدى جەڭىس قاسىمبەك.

ايتا كەتەيىك، Tarlan Astana جەڭىل رەلستى كولىك جۇيەسى اۆتوبۋس مارشرۋتتارىمەن جانە كولىكتىك-لوگيستيكالىق توراپتارمەن ينتەگراتسيالانادى.