ەلوردادا ايگىلى لەوناردو دا ۆينچيگە ارنالعان حالىقارالىق كورمە وتەدى
استانا. KAZINFORM - استاناداعى بەيبىتشىلىك جانە كەلىسىم سارايىندا 19-مامىر مەن 30-قىركۇيەك ارالىعىندا ايگىلى لەوناردو دا ءۆينچيدىڭ ءومىرى مەن عىلىمي ىزدەنىستەرىنە ارنالعان Leonardo da Vinci: Genius of the Renaissance حالىقارالىق كورمەسى وتەدى، دەپ حابارلايدى ەلوردا اكىمدىگىنىڭ رەسمي سايتى.
ەلورداعا ريم جانە فلورەنتسيا مۋزەيلەرىنەن لەوناردو دا ۆينچيدىڭ اتاقتى ۆينچي كودەكستەرىندەگى سىزبالارى مەن جازبالارى نەگىزىندە جاسالعان 40 تان استام تولىق كولەمدى مەحانيزم ۇلگىلەرى جەتكىزىلدى. ەكسپوناتتار قاتارىندا ۇشۋ اپپاراتتارى، ينجەنەرلىك قۇرىلىمدار، اسكەري ماشينالار مەن ءوز زامانىنان وزىق تۋعان قۇرىلعىلار بار. بۇل ونەرتابىستار كەيىننەن زاماناۋي تەحنولوگيالاردىڭ باستاۋىنا اينالدى.
كورمە شامامەن 3 مىڭ شارشى مەتر اۋماقتى قامتيدى. كەڭىستىك اۋا، سۋ، جەر جانە وت تاقىرىپتارىنا بولىنگەن. بۇل كەلۋشىلەرگە لەوناردونىڭ تابيعات كۇشتەرىن، قوزعالىستى، ادام اناتومياسىن جانە مەحانيكا زاڭدىلىقتارىن قالاي زەرتتەگەنىن تەرەڭىرەك تۇسىنۋگە مۇمكىندىك بەرەدى. جەكە ءبولىم سۋرەتشىنىڭ ەڭ تانىمال تۋىندىلارىنىڭ رەپرودۋكسيالارىنا ارنالعان. كورمە زاماناۋي مۋلتيمەديالىق فورماتتا بەزەندىرىلگەن. LED تۋننەلدەر، تسيفرلىق پروەكتسيالار مەن گولوگرافيالىق ينستاللياتسيالار لەوناردو دا ءۆينچيدىڭ يدەيالارىن ۆيزۋالدى تۇردە پاش ەتىپ، ونىڭ ونەرتابىستارى قالاي جۇمىس ىستەۋى مۇمكىن بولعانىن تانىستىرادى.
كورمە قازاقستان رەسپۋبليكاسى مادەنيەت جانە اقپارات مينيسترلىگىنىڭ جانە استانا قالاسى اكىمدىگىنىڭ قولداۋىمەن ۇيىمداستىرىلىپ وتىر. جوبانى جۇزەگە اسىرۋشى - «استانا كونسەرت» كومپانياسى.
كورمە كۇن سايىن ساعات 10.00 دەن 20.00 گە دەيىن دەمالىسسىز جۇمىس ىستەيدى. مەكەنجايى: تاۋەلسىزدىك داڭعىلى، 57، بەيبىتشىلىك جانە كەلىسىم سارايى.
ەسكە سالا كەتەيىك، بۇعان دەيىن ەلوردادا قازاقستان حالقىنىڭ مادەنيەتىنە ارنالعان كورمە ۇيىمداستىرىلعانىن جازعانبىز.
