لوندونداعى الاپات كوپقاباتتى ءۇي ءورتىنىڭ سەبەپتەرى انىقتالدى
لوندون. KAZINFORM - ەكىنشى دۇنيەجۇزىلىك سوعىسىنان بەرى ۇلى بريتانيادا بولماعان الاپات ءۇي ءورتىنىڭ سەبەپتەرى ەندى انىقتالدى.
قوعامدىق تەرگەۋ اپاتقا ۇكىمەتتى، ءورت سوندىرۋشىلەردى جانە تەز جانعىش قاپتامامەن قاپتاعان كومپانيالاردى كىنالى دەپ تاپتى، دەپ حابارلايدى Kazinform ءتىلشىسى.
2017 -جىلى 72 ادامنىڭ ءومىرىن قيعان گرەنفەلل-تاۋەر تۇرعىن ۇيىندەگى ورتكە بيلىك، ىسىنە سالعىرت قاراعان قۇرىلىس كومپانيالارى جانە ءورت سوندىرۋشىلەردىڭ كاسىبيسىزدىگى سەبەپ. 6 جىلعا سوزىلعان قوعامدىق تەرگەۋدىڭ قورىتىندىسى وسىنداي. كواليتسيالىق جانە كونسەرۆاتيۆتىك ۇكىمەتتەر مامانداردىڭ قاۋىپسىزدىككە قاتىستى الاڭداۋشىلىعىن ەلەمەگەن نەمەسە كەيىنگە قالدىرۋمەن بولعان، دەلىنگەن زەرتتەۋدە.
23 قاباتتى مۇنارا پىشىندەس عيماراتتىڭ سىرتى تەز جانعىش قۇرىلىس ماتەريالدارىمەن قاپتالعاندىقتان ءتىلسىز جاۋ جەدەل تاراپ، تىزگىن بەرمەگەن. ۇيدەن شىقپاي قۇتقارۋشىلاردى كۇتىڭدەر دەگەن رەسمي نۇسقاۋلىققا قۇلاق اسقان تۇرعىندار پاتەرلەرىندە تىرىدەي ورتەنىپ كەتكەن. قايتىس بولعانداردىڭ اراسىندا 18 بالا، 15 مۇمكىندىگى شەكتەۋلى جان بولعان.
«مەن مۇنداي ءورتتى بۇرىن-سوڭدى كورگەن ەمەسپىن. وتە قورقىنىشتى بولدى، قاتتى جىلادىم. كومەكتەسكىم كەلدى، ءبىراق قولىمنان كەلمەدى. جوعارعى قاباتتاردان ادامداردىڭ جان داۋسى ەستىلدى. وتە جانتۇرشىگەرلىك جاعداي بولدى»، - دەيدى لوندون تۇرعىنى ناسيما بۋتريگ.
قوعامدىق تەرگەۋدىڭ ءتوراعاسى كىسى ءولىمىنىڭ الدىن الۋعا ابدەن بولار ەدى دەپ مالىمدەمە جاسادى. تۇرعىندارعا بىرنەشە جىل قاتارىنان ءقاۋىپ تونسە دە جان ايقايىنا ەشكىم قۇلاق اسپادى دەگەن پىكىر ايتىلدى. زەرتتەۋ ناتيجەسىنە سايكەس نەگىزگى جاۋاپكەرشىلىك كوپقاباتتى ۇيگە تەحنيكالىق قىزمەت كورسەتۋشى فيرماعا، جەرگىلىكتى جانە ۇلتتىق ورگاندارعا، سونداي- اق تەز جانعىش قاپتامالاردى ءقاۋىپسىز دەپ ساتقان كومپانيالارعا جۇكتەلدى.
«قۇرىلىس ماتەريالدارىنىڭ كەيبىر تۇرلەرى، اتاپ ايتقاندا اليۋمينيدەن جاسالعان كومپوزيتتىك پانەلدەر قاۋىپتى. ۇكىمەت جانە باسقا دا تەكسەرۋشى ورگاندار بۇل ولقىلىقتى ەرتە كەزدە انىقتاماعان دەپ ويلايمىز. كومپانيالار ءوز ونىمدەرىنىڭ قاۋىپسىزدىگى تۋرالى جالعان اقپارات بەرىپ، جۇيەلى تۇردە اداستىرىپ وتىرعان»، - دەيدى تەرگەۋ جونىندەگى كوميسسيا ءتوراعاسى مارتين مۋر-بيك.
سونداي-اق، سول كەزدەگى ۇكىمەتكە، لوندونداعى كەنسينگتون جانە چەلسي اۋداندارىنداعى جەرگىلىكتى بيلىككە، سالا باسشىلارىنا، رەتتەۋشى ورگاندارعا جانە كوپ قاباتتى ۇيلەردەگى ءورت قاۋىپسىزدىگىنە جىلدار بويى كوز جۇما قاراعان ءورت ءسوندىرۋ توبىنا سىن ايتىلىپ، ايىپتار تاعىلدى.
پرەمەر-مينيستر مەملەكەت اتىنان ءورت قۇرباندارىنان كەشىرىم سۇرادى.
«قايعىلى جاعدايدان زارداپ شەككەن ءارقايسىڭىزدان كەشىرىم سۇراعىم كەلەدى. مۇنداي جاعداي بولماۋى كەرەك ەدى. مەملەكەت ءوزىنىڭ ەڭ باستى مىندەتى - سىزدەردى جانە سىزدەردىڭ جاقىندارىڭىزدى قاۋىپتەن قورعاي المادى»، - دەدى ۇلى بريتانيا پرەمەر- ءمينيسترى كير ستارمەر.
ۇلى بريتانيانىڭ باسقا قالالارىمەن سالىستىرعاندا لوندوندا بيىك عيمارات 2 ەسە كوپ. شاھار باسشىسىنىڭ پىكىرىنشە، 1300 تۇرعىن ءۇيدىڭ ساپاسى ءالى دە سىن كوتەرمەيدى. سىرتقى قاپتاماسى، باسپالداقتارى جانە ەۆاكۋاتسيالىق جەدەل ساتىلارى قاۋىپتى. وتباسىلار تۇندە قورقىنىشپەن ۇيىقتايتىنداي كۇي كەشىپ ءجۇر.
«گرەنفەلل- تاۋەردەگى ءورت ءبىزدىڭ وركەنيەتتى ەل ەكەندىگىمىزگە كۇمان كەلتىرگەندەي. ءومىرىن قيعاندار قوعامىمىزدىڭ ەڭ وسال توپتارى: بالالار، مۇگەدەكتەر، قارا ناسىلدىلەر، ازيالىقتار، ەتنيكالىق جانە ءدىني ازشىلىقتار. مەنىڭ ويىمشا، ولارعا ورتكە دەيىن، ءورت كەزىندە جانە ودان كەيىن دە سەلقوس قاراعان»، - دەدى لوندون ءمەرى ساديك حان.
ۇكىمەت قايعىلى وقيعاعا قاتىسى بار قۇرىلىس كومپانيالارىنا رەسمي حات جىبەرىپ، كەلىسىم- شارتتادى توقتاتادى. سونداي- اق لوندون پوليتسياسى مەن پروكۋراتۋراعا ءىستى تەرگەۋدە بارىنشا قولداۋ كورسەتەدى.
