لوندوندا قازاقستاننىڭ ينۆەستيتسيالىق الەۋەتى تانىستىرىلدى
لوندون. KAZINFORM - «استانا» حالىقارالىق قارجى ورتالىعى لوندوندا شەتەلدىك ينۆەستورلاردىڭ باسىن قوستى. ماقسات - قازاقستاننىڭ ينۆەستيتسيالىق مۇمكىندىكتەرى تۋرالى ايتىپ بەرۋ.
ەلىمىزدەگى قارجى نارىعىن ودان ءارى تارتىمدى ەتۋ ءۇشىن نە ىستەۋ كەرەكتىگىن ءبىلۋ، دەپ حابارلايدى Kazinform-نىڭ سول ەلدەگى مەنشىكتى ءتىلشىسى عالىمجان قارامان ۇلى.
جاھاندىق گەوساياسي جاعداي ينۆەستورلارعا حالىقارالىق نارىقتارعا شىعۋدى قيىنداتتى. بيزنەس قاۋىمداستىق كاسىبىن دوڭگەلەتۋ ءۇشىن جاڭا باعىتتار ىزدەۋگە ءماجبۇر. ال قازاقستان ەۋرازيا قۇرلىعىنىڭ كىندىگىندە ورنالاسقان.
ءبىزدىڭ ەل ارقىلى ەۋرازيا ەكونوميكالىق وداعى مەن قىتاي جانە كاسپي ءوڭىرى ەلدەرىنە تىكەلەي شىعۋعا بولادى.
«استانا» حالىقارالىق قارجى ورتالىعى ءىرى ينفراقۇرىلىمدىق جوبالاردى جۇزەگە اسىرۋعا مول مۇمكىندىك بەرىپ وتىر.
«باستاپقىدا، 2022 -جىلى، ارينە، كوپتەگەن ينۆەستورلار ويلانىپ قالدى. ياعني، ءبىزدىڭ ايماقتا جاعداي قالاي داميتىندىعىنا كۇمانمەن قارادى. ءبىراق ءبىز ساياسي- ەكونوميكالىق رەفورمالاردى جالعاستىرىپ جاتقانىمىزدى، اشىقتىعىمىزدى كورسەتتىك. سوعان بايلانىستى سىرتقى تىكەلەي ينۆەستيتسيالار سول جىلى رەكوردتىق دەڭگەيدى كورسەتتى»، - دەيدى «استانا» حالىقارالىق قارجى ورتالىعىنىڭ باسقارۋشىسى رەنات بەكتۇروۆ.
بۇعان دەيىنگى تانىستىرىلىم لوندوندا 5 جىل بۇرىن ءوتىپتى.
«ودان بەرى ورتالىق جۇمىسى نىعايدى. ءبىرشاما تابىستى جوبا جۇزەگە اسىرىلدى. الەمنىڭ ەڭ ءىرى قارجى ورتالىقتارىنىڭ بىرىندە وتكىزىلىپ جاتقان شاراعا قازاقستانعا ينۆەستيتسيالاۋ مۇمكىندىكتەرى تۋرالى بىلگىسى كەلەتىن جۇرتشىلىقتىڭ كوپتەپ جينالۋى قۋانتادى» - دەيدى قازاقستاننىڭ ۇلى بريتانياداعى ەلشىسى ماعجان ءىلياسوۆ.
تانىستىرىلىمعا 70 تەي حالىقارالىق، ينۆەستيتسيالىق بانكتەن، قارجى-كونسالتينگتىك كومپانياسىنان، زاڭ فيرماسىنان 120 عا جۋىق وكىل كەلدى.
ولار ورتالىقتىڭ وڭىردەگى قارجى سەكتورىن جەتىلدىرۋدەگى رولىن تالقىلادى.
قازاقستانداعى اكتسيونەرلىك جانە بورىشتىق كاپيتال نارىعىن دامىتۋ بويىنشا ءوز ويىن ورتاعا سالدى.
ايتا كەتۋ كەرەك ورتالىق بيرجاسى ىسكە قوسىلعالى بەرى تارتىلعان بورىشتىق كاپيتالدىڭ جالپى كولەمى 4 ميلليارد دوللاردان اسادى، ۇلەستىك كاپيتال 365 ميلليونعا جەتىپ وتىر.
«الەمدەگى ەڭ ءىرى كاستوديان بانكتەر «استانا» حالىقارالىق قارجى ورتالىعى بيرجاسىنىڭ دەپوزيتارلىق كليەنتىنە اينالدى. شەتەلدىك جانە قازاقستاندىق ينۆەستورلار ساۋدا جاساي الاتىن ينتەگراتسيالانعان كاپيتال نارىعى قۇرىلدى. بۇدان بولەك بيۋروكراتيانىڭ جوقتىعى، سالىقتىق جەڭىلدىكتەر ورتالىقتىڭ تارتىمدىلىعىن ارتتىرىپ وتىر»، - دەيدى Wood Company ينۆەستيتسيالىق بانكىنىڭ ءبولىم باسشىسى نيك كاۋفمانن.
Polymetal International PLC كومپانياسىنىڭ ديرەكتورى ەۆگەني موناحوۆ قولايلى بيزنەس ورتا جاساپ بەرگەن ارىپتەستەرىنە ريزاشىلىعىن ءبىلدىردى.
«ءبىز قازاقستانعا زاڭدى تۇردە وتكەن جىلدىڭ تامىزىندا كوشىپ كەلدىك. ازىرگە ءبارى ۇناپ جاتىر. ءبىز كۇردەلى گەوساياسي جاعدايدا جانعا جايلى مەكەن تاپقانىمىزعا وتە قۋانىشتىمىز»، - دەيدى Polymetal International PLC كومپانياسىنىڭ ديرەكتورى ەۆگەني موناحوۆ.
«استانا» حالىقارالىق قارجى ورتالىعى اشىلعالى بەرى قازاقستان ەكونوميكاسىنا 11 ميلليارد دوللارعا جۋىق قاراجات تارتىلعان.
ونىڭ شامامەن 40 پايىزى ورتالىق بيرجاسى ارقىلى جۇزەگە استى.
وتكەن جىلدىڭ قاراشاسىندا بيرجادا ساۋدا-ساتتىقتىڭ 61 پايىزىن شەتەلدىك ينۆەستورلار جاساعان.
