لوندوندا شەتەلدىكتەر قازاق ءتىلىن ۇيرەنىپ جاتىر

  سونداي- اق ولاردىڭ ۇلتتىق داستۇرىمىزگە دەگەن قىزىعۋشىلىعى دا ەرەكشە. لوندونداعى شەتەلدىك ديپلوماتتاردىڭ جۇبايلارى قازاقستان ەلشىلىگىنە جينالدى. يسلانديا، كاتار، پاكىستان، مالايزيا جانە باسقا دا مەملەكەت وكىلدەرى ۇلى ابايدىڭ ءتىلىن ۇيرەنگىسى كەلەدى.

لەكسيكالىق قورى 2 جارىم ميلليون سوزدەن اساتىن قازاق ءتىلىن ءبىر مەزەتتە مەڭگەرۋ مۇمكىن ەمەس ەكەندىگىن جاقسى بىلەتىن ۇيرەنۋشىلەر ءالقيسسانى اماندىق- ساۋلىقتان باستادى.

سارا نايم، پاكىستاننىڭ ۇلى بريتانياداعى ەلشىسىنىڭ جۇبايى:

- بۇگىن كەيبىر قازاق سوزدەرىن ۇيرەندىم. سالەمدەسۋدەن بولەك مۇعالىمنەن قازاقتىڭ ۇلتتىق تاعامدارى قالاي اتالاتىنىن ءبىلدىم.

مۇعالىمنىڭ ەسىمى - كاۋسار عالىمجان قىزى. جاسى 11 دە. قارشاداي قىز اتا- اناسىنىڭ قىزمەت بابىمەن لوندوندا ۋاقىتشا تۇرىپ جاتىر. وقۋدان قولى قالت ەتكەندە شەتەلدىكتەرگە قازاق ءتىلىن ۇيرەتەدى. ۇستىندە ۇلتتىق كيىم، باسىندا ساۋكەلە، قوس بۇرىمىنىڭ تۇبىندە شاشباۋ. ساباقتارىن انمەن ارلەپ، بيمەن كوركەمدەيدى. بۇدان بولەك شەتەلدىكتەرگە قازاق مادەنيەتىنىڭ اجىراماس بولىگى شاي ءىشۋ ءراسىمى كورسەتىلدى. كەلىن وبرازىنداعى ەلشىلىك قىزمەتكەرى شاي دەمدەۋدەن باستاپ، قانداي كولەمدە قۇيۋ كەرەكتىگىن تاپتىشتەپ ءتۇسىندىردى. داستارحاندا ۇلتتىق تاعامنىڭ ءتۇر- ءتۇرى تۇر. قۇرت، ىرىمشىك، تارى، جەنتتى بۇرىن- سوڭدى جەپ كورمەگەن قوناقتار ءدان ريزا.

نور ايني ابدۋل راحمان، مالايزيانىڭ جوعارى كوميسسارىنىڭ جۇبايى:

- شاي قۇيۋ ءراسىمى وتە قىزىق ءوتتى. مەن ءۇشىن بۇل ۇلكەن جاڭالىق. مادەنيەتتەرىڭىز وتە باي ەكەن. بۇگىن شاعىن ءبىر بولىگى عانا كورسەتىلدى دەپ ويلايمىن.

رايا ءالحاليفا، كاتاردىڭ ۇلى بريتانياداعى ەلشىسىنىڭ جۇبايى:

- ۇلتتىق قۇندىلىقتارىڭىز تۋرالى ءبىلىپ، رۋحاني سۋسىندادىق. ابىسىنداردىڭ تاتۋلىعى، جاڭا تۇسكەن كەلىننىڭ العاش شاي بەرۋى - ءبار ءبىز ءۇشىن قىزىق بولدى. شاي قۇيعاندا كەسەلەردى شاتاستىرىپ الماۋ دا ۇلكەن ونەر دەپ تۇسىنەمىن.

قازاق ايەلدەرىنىڭ وتباسىندا عانا ەمەس، قوعامداعى ءرولى تۋرالى دا كەڭىنەن ايتىلدى. مەملەكەت گەندەرلىك تەڭدىكتى ساقتاۋعا، ايەلدەر قۇقىعىن قورعاۋعا جانە وتباسى قۇندىلىقتارىن نىعايتۋعا ءاردايىم باسا ءمان بەرەدى، دەدى ۇيىمداستىرۋشىلار.

اقمارال ايداربەكوۆا، قازاقستاننىڭ ۇلى بريتانياداعى ەلشىسىنىڭ جۇبايى:

- قازىرگى قازاق ايەلىنىڭ بەينەسى ءوز وشاعىنىڭ بەرەكەسىن كەلتىرىپ، جولداسىن ءسۇيىپ، بالالارىن تاربيەلەۋمەن قاتار بەلگىلى ءبىر سالادا جۇمىس اتقارىپ، قوعامىنا پايدا اكەلەتىن تۇلعا رەتىندە كورىنەدى. ءبىز سول تۋرالى ايتقىمىز كەلدى.

ءىس- شاراعا ەلشىلىكتەگى جانى نازىك قىزمەتكەرلەردىڭ مۇرىندىق بولعان. داستارحان دا جايعان، كونتسەرتتى دە ۇيىمداستىرعان وزدەرى. مۇنىمەن قويماي، مۋزىكالىق اسپاپتاردا ويناپ، اۋەلەتە ءان سالىپ، مىڭ بۇرالا بي دە بيلەپ بەردى.

اۆتورى: عالىمجان قارامان ۇلى

www.24.kz