لوندون مارافونىندا ءبىر جارىستا ءۇش سپورتشى الەم رەكوردىن جاڭارتتى

جارىس جەڭىمپازى كەنيالىق سەباستيان ساۆە بولدى. ول مارافون قاشىقتىعىن 1 ساعات 59 مينۋت 30 سەكۋندتا جۇگىرىپ ءوتىپ، تاريحتا رەسمي تۇردە ەكى ساعاتتان از ۋاقىتتا مارافوندى اياقتاعان العاشقى ادام اتاندى.

ەكىنشى ورىندى مارافون قاشىقتىعىندا العاش رەت باق سىناعان ەفيوپيالىق يوميف كەدجەلچا يەلەندى - 1:59.41. ءۇشىنشى بولىپ جارتىلاي مارافون بويىنشا الەم رەكوردىنىڭ يەگەرى، ۋگاندالىق دجەيكوب كيپليمو مارە سىزىعىن 2:00.28 ناتيجەسىمەن كەستى.

ۇشەۋى دە 2023 -جىلى چيكاگو مارافونىندا كەنيالىق كەلۆين كيپتۋم ورناتقان 2:00.35 الەمدىك رەكوردىنان وزىپ ءتۇستى. ساۆە بۇل ناتيجەنى ءبىر مينۋتتان استام ۋاقىتقا جاقسارتتى.

جەڭىمپاز شەشۋشى سەرپىلىستى مارەگە 10 شاقىرىم قالعاندا جاسادى. ۇيىمداستىرۋشىلاردىڭ مالىمەتىنشە، جارىستىڭ العاشقى جارتىسىندا-اق ساۆە الەم رەكوردىنىڭ كەستەسىمەن كەلە جاتقان جانە ونى 1:00.29 ۋاقىتتا باعىندىرعان. قاشىقتىقتىڭ ەكىنشى بولىگىندە ول قارقىنىن ودان ءارى ۇدەتتى.

- ءوزىمدى كەرەمەت سەزىنىپ تۇرمىن. بۇل - ءومىر بويى ەستە قالاتىن كۇن. مارە سىزىعىن كەسىپ ءوتىپ، ۋاقىتتى كورگەندە قاتتى قۋاندىم، - دەدى ساۆە BBC-گە بەرگەن سۇحباتىندا.

كەنيالىق سپورتشىنىڭ جەڭىسى توسىن جاعداي بولعان جوق. ول بۇعان دەيىن وتكەن جىلى لوندون مارافونىندا، ال 2024 -جىلى بەرلين مارافونىندا جەڭىسكە جەتكەن. جارىس قارساڭىندا ول BBC Sport-قا جاڭا الەم رەكوردىن ورناتۋ ۋاقىت ەنشىسىندەگى ماسەلە ەكەنىن ايتقان ەدى.

ايتا كەتەيىك، جۋىردا گۋمانويد روبوت جارتىلاي مارافوننان ەرلەر اراسىنداعى رەكوردتى جاڭارتتى.